უელსის სამიტზე, 4-5 სექტემბერს ნატო-ს მოუწევს,  მიიღოს გადაწყვეტილება აღმოსავლეთში საკუთარი ყოფნა გააძლიეროს და საკუთარი ძალების მზადყოფნა აამაღლოს. ამის შესახებ ალიანსის გენერალურმა მდივანმა, ანდერს ფოგ რასმუსენმა ნორვეგიის პრემიერ-მინისტრ ერნა სულბერგთან ერთობლივ პრესკონფერენციაზე განაცხადა. "მოგვიწევს ორი მნიშვნელოვანი გადაწყვეტილების მიღება – ერთი ეხება კოლექტიური თავდაცვის სისტემების შემდგომ გაძლიერებას აღმოსავლეთში და ჩვენი ყოფნის გაძლიერებას. ამან უნდა უზრუნველყოს ჩვენი მზადყოფნა, საჭიროების შემთხვევაში, დავიცვათ ორგანიზაციის წევრები. ამისთვის საჭირო იქნება ევროპაში რაც შეიძლება მეტი სწავლებების ჩატარება", – განაცხადა რასმუსენმა. ნორვეგიის პრემიერ-მინისტრის, ერნა სულბერგის განცხადებით, უკრაინის კრიზისი ევროპული უსაფრთხოებისთვის გამოწვევას წარმოადგენს. "ჩემი აზრით, ნატო საგრძნობლად გაძლიერდა ამ დროის განმავლობაში. მიღებულია, ასევე, მნიშვნელოვანი პროგრამა მისი შემდგომი გაძლიერებისთვის. ეს ძალიან მნიშვნელოვანია ამ ვითარებაში", – განაცხადა სულბერგმა.