თენგიზ ერისთავი თავისუფალია. გადაწყვეტილება საქალაქო სასამართლომ გუშინ მიიღო. ერისთავს, აღკვეთის ღონისძიების სახით, შეფარდებული წინასწარი პატიმრობა 10-ათასლარიანი გირაოთი შეეცვალა. სასამართლოს აღმკვეთი ღონისძიების შეცვლის შუამდგომლობით დაცვის მხარემ მიმართა. მოსამართლემ შუამდგომლობა დასაშვებად ცნო. როგორც ერისთავის ოჯახის წევრები განმარტავენ,მათთვის მოულოდნელი იყო თენგო ერისთავის გათავისუფლება. ვაკეში მოკლული ლაშა მახარაძის მეგობარი თენგიზ ერისთავი 17 სექტემბერს სამართალდამცავებმა დააკავეს. მისი გათავისუფლების მოთხოვნით რამდენიმე საპროტესტო აქცია გაიმართა და ხელმოწერები შეგროვდა. მას ბრალად განსაკუთრებით დიდ ოდენობით ნარკოტიკული საშუალებების შეძენა-შენახვა ედება. თუმცა თენგიზ ერისთავი დანაშაულს არ აღიარებს და აცხადებდა, რომ მას ნარკოტიკები ჩაუდეს. თენგიზ ერისთავის საქმის განხილვა 29 ოქტომბერს გაგრძელდება. ერისთავის ინტერესების დამცველის თქმით, სასამართლომ ობიექტური გადაწყვეტილება მიიღო,აღკვეთის ღონისძიების შეფარდების თაობაზე. ლევან ვეფხვაძე იმედოვნებს, რომ სასამართლო საბოლოოდ გამოიტანს გამამართლებელ განაჩენს და შეწყვეტს სისხლისსამართლებრივ დევნას თენგო ერისთავის წინააღმდეგ. "ახალგაზრდა იურისტთა ასოციაცია" კვლავ გააგრძელებს ერისთავის ინტერესების დაცვას.