საქართველოს შეიარაღებული ძალების IV მექანიზირებული ბრიგადის ნაკრები ასეულის პირადი შემადგენლობა უკვე ავღანეთშია. თავდაცვის სამინისტროს ინფორმაციით, ასეულს ავღანეთში საქართველოს შეიარაღებული ძალების უფროსი სამხედრო წარმომადგენელი,პოლკოვნიკი ჯონი ტატუნაშვილი დახვდა. "ქართველი სამხედროები, გერმანული სარდლობის დაქვემდებარებაში, ავღანეთის ჩრდილოეთით მაზარ-ი-შარიფში მდებარე სამხედრო ბაზა "მარმალზე" საერთაშორისო მისიას 6 თვის განმავლობაში შეასრულებენ. ქართული ასეული როტაციის წესით ერთ-ერთ გერმანულ დანაყოფს ჩაანაცვლებს. მისიის გადაბარების ოფიციალური ცერემონიალი მოგვიანებით გაიმართება", - აცხადებენ თავდაცვის სამინისტროში. მათივე განმარტებით, IV მექანიზირებული ბრიგადის ასეულმა საქართველოში 13 კვირიანი წვრთნა, ხოლო გერმანიის ფედერაციულ რესპუბლიკაში, "ვილდფლეკენისა" და "ჰამელბურგის" სამხედრო ბაზებზე, 5-თვიანი სწავლება რამდენიმე ეტაპად გაიარა. "ჯარისკაცებს, გერმანელი ინსტრუქტორების მეთვალყურეობით, ბუნდესვერის ჯარისკაცებთან ერთად, ინდივიდუალური, ოცეულის, ასეულის დონის კომბინირებული და სიტუაციური წვრთნები ჩაუტარდათ. გერმანელი ინსტრუქტორების მიერ სამხედროების მომზადების დონე და საბრძოლო მზადყოფნა კონკრეტული ამოცანების შესასრულებლად დადებითად შეფასდა", - აღნიშნავენ უწყებაში.