ციურიხის "კონგრესჰაუსში" ფიფას გალა-დაჯილდოება გაიმართა. ცნობილი გახდა 2014 წლის საუკეთესო ფეხბურთელების (ქალებსა და ვაჟებში) და მწვრთნელების (ქალებსა და ვაჟებში) ვინაობა. 29 წლის კრიშტიანო რონალდო ("რეალი", პორტუგალია) გახდა მთავარი პრიზის მფლობელი ზედიზედ მეორედ (სულ მესამედ, ერთხელ "ოქროს ბურთი" მან ფიფას და "ფრანს ფუტბოლის" პრიზების გაერთიანებამდე მიიღო). კრიშტიანო რონალდომ მიიღო ხმების 37,66%. მეორე ადგილზე გავიდა ლიონელ მესი ("ბარსელონა", არგენტინა) - 15,76%, ხოლო მესამეზე - მანუელ ნოიერი ("ბაიერნი", გერმანია) - 15,72%. კრიშტიანო რონალდო: "დარბაზში ვხედავ ჩემს ვაჟს, დედას, ოჯახს... მადლობა ყველას, ვინც კონკურსში ხმა მომცა. მადლობა მწვრთნელს, კლუბის პრეზიდენტს, თანაგუნდელებს, ვისთან ერთადაც ფანტასტიკური წელიწადი გავიარე. ასეთ კონკურსში გამარჯვება უნიკალური ფაქტია. ასეთივე შემართებით გავაგრძელებ თამაშს და შრომას. მსურს, კვლავ მოვიპოვო ინდივიდუალური და გუნდური პრიზები. ვერასოდეს წარმოვიდგენდი, რომ "ოქროს ბურთის" მფლობელი სამჯერ გავხდებოდი. მსურს, ფეხბურთის ისტორიაში საუკეთესო გავხდე, ეს კი ახალ მსხვერპლს მოითხოვს".