ზუგდიდში სოციალურად დაუცველთა უფასო კვების უზრუნველყოფა რამდენიმე დღით იყო შეწყვეტილი.
ქალაქ ზუგდიდის საკრებულოს დღევანდელ სხდომაზე სწორედ ეს საკითხი იქცა განხილვის თემად. ის ქალაქის საკრებულოს ფრაქციამ „ერთიანი ნაციონალური მოძრაობა“ დააყენა.

უფასო კვების პროგრამის შეფერხების გამო საკრებულოს თავმჯდომარე მერაბ ქვარაიამ წუხილი გამოთქვა და ფაქტს სამწუხარო უწოდა. მან პროგრამის შეწყვეტასთან დაკავშირებით მერიის შესაბამის სამსახურების თანამშრომლებს განმარტებები მოსთხოვა.

მერიის საფინანსო-საბიუჯეტო სამსახურის უფროსის მურთაზ ბოკუჩავას განცხადებით, 2016 წლის ბიუჯეტის დამტკიცებამდე ტენდერს ვერ გამოაცხადებდნენ და სწორედ ამან შეაფერხა პროგრამის ამოქმედება.

„ტენდერის გამოცხადების პროცედურები ბიუჯეტის დამტკიცებიდან მეორე დღეს დაიწყო, მაგრამ მისი ოფიციალური გამოცხადება 31 დეკემბრის ჩათვლით ვერ მოხერხდა. შესყიდვების სააგენტომ 30 დეკემბრამდე, როგორც ამას კანონი ითვალისწინებს, ვერ მოასწრო ტენდერისთვის ნომრის მონიჭება. როგორც კი სააგენტომ მოგვანიჭა ნომერი, დაიწყო პროცედურების განხორციელება. გამარჯვებული პრედენტენტის გამოვლენის შემდეგ საჭირო იყო საკითხების დაზუსტება. ამის შემდეგ არანაკლებ სამი დღეა სავალდებულო მომწოდებელთან ხელშეკრულება გაფორმდეს. ავტომატურად თუ მექანიკურად გადმოვედით 2016 წლამდე“ , - აღნიშნა მურთაზ ბოკუჩავამ.

საკრებულოს დღევანდელ სხდომაზე მოქალაქეებიც იმყოფებოდნენ. ერთ-ერთმა მათგანმა ეგნატე შამუგიამ მერიის სამსახურებს განუცხადა, რომ შესყიდვების კანონი მომავალი წლის ბიუჯეტის მიღებამდე იძლევა საშუალებას, რომ განხორციელდეს შესყიდვა.

„ერთადერთი მიზეზი რის გამოც ტენდერი ვერ გამოცხადდა - მერის შესაბამისი სამსახურების არაკომპეტენტურობაა“, - აღნიშნა ეგნატე შამუგიამ ჟურნალისტებთან საუბრისას.

ნაციონალური მოძრაობის წევრის ანა წითლიძის თქმით კი, მერიის სამსახურებს უნდა სცოდნოდათ, რომ ეს პრობლემა აუცილებლად დადგებოდა.

„ვერავინ დამარწმუნებს, რომ ტენდერის გამოცხადება ადრე არ შეიძლებოდა და ეს ისე გაკეთებულიყო, რომ 260 ბენეფიციარი არ დარჩენილიყო მშიერი“, - განაცხადა წითლიძემ.
ბოლოს, საკრებულოს თავმჯდომარემ აუდიტის სამსახურს საკითხის შესწავლა დაავალა.

ქალაქ ზუგდიდის 2016 წლის ადგილობრივ ბიუჯეტში უფასო სასადილოს მომსახურების პროგრამაზე 115 ათასი ლარია გამოყოფილი. 2016 წელს აღნიშნულ პროგრამას შპს „ეფექტი“ განახორციელებს. სწორედ ამ კომპანიამ მოიგო აღნიშნული ტენდერი.