„არა რუსულ პროექტს“, „არა ზვიად სიჭინავას“, - ზუგდიდის მერობის დამოუკიდებელი კანდიდატის საარჩევნო შტაბის ინფორმაციით, მსგავსი შინაარსის ბუკლეტებს ქალაქის ქუჩებში არიგებენ. ბუკლეტებზე ზვიად სიჭინავას ფოტო და მის მიერ სოხუმში სტუმრად ყოფნისას, ერთ-ერთ ოჯახში, სუფრასთან წარმოთქმული სადღეგრძელოდან ამონარიდებია დაბეჭდილი. „მე ამაყი ვარ, რომ ეს ქალაქი ამ ქვეყნის დედაქალაქია“, - წერია ფლაერებზე.

სიჭინავას პრესსამსახურის ხელმძღვანელი მაგდა კლდიაშვილი ამბობს, რომ ფლაერებს ქალაქში ახალგაზრდების გარკვეული ჯგუფი ავრცელებს. გარდა ამისა, მოქალაქეებს ისინი იმ ვიდეოს აჩვენებენ, რომელშიც სადღეგრძელოს კადრებია მოცემული.

„მოვუწოდებთ ხელისუფლებას, თუ ისინი ავრცელებენ ამ ყველაფერს, დაანებონ თავი ამ პროვოკაციულ ქმედებებს და მიხედონ იმ ხალხს, რომელიც გუშინ გუბერნიის წინ იდგა და აზიური ფაროსანას მიერ მიყენებული ზარალის დათვლას და კომპენსაციას ითხოვდა. ჩვენ ვვარაუდობთ, რომ ამ ყველაფრის უკან მმართველი პარტია დგას, რადგან ბუკლეტები იმდენად მაღალ პოლიგრაფიულ დონეზეა დაბეჭდილი, რომ, ვეჭვობთ, ახალგაზრდებს ეს თავიანი ჯიბის ფულით გაეკეთებინათ. ასევე გვაქვს ინფორმაცია, რომ ახალგაზრდები, რომლებიც, სავარაუდოდ, ამ ფლაერებს ავრცელებდნენ, გუშინ ზუგდიდის მერობის კანდიდატს ახლდნენ, თუმცა ამას ვერ ვამტკიცებთ“, - აღნიშნავენ სიჭინავას პრესსამსახურში.

სოციალურ ქსელში ზემოაღნიშნული ვიდეო 2015 წლის შემოდგომაზე გავრცელდა.

„ძალიან მიყვარს ეს ქალაქი. ჩემთვის აფხაზეთი სოხუმის გარეშე არ არსებობს. სოხუმი ჩემთვის მნიშვნელოვანი ადგილია. მე ძალიან ვამაყობ რომ ეს ქალაქი ამ ქვეყნის დედაქალაქია. მე მინდა დავლიო ამ ქვეყნის სადღეგრძელო. იმ ქვეყნის რომელიც ცხოვრობს ისე, როგორც ცხოვრობს. მას აქვს თავისი დანიშნულება, თავისი სურვილი და მიზანი, რომლისკენაც მიისწრაფის. ყოველთვის ვამბობ, რომ აფხაზი მეგობრები უფრო მეტი მყავს, ვიდრე ქართველები“, - ამბობს ის სადღეგრძელოს წარმოთქმისას.

სოციალურ ქსელში აღნიშნული ვიდეოს გავრცელების შემდეგ ზვიად სიჭინავამ განმარტა: „ძალიან ვწუხვარ ვიდეოში ჩემ მიერ გამოთქმული ფრაზების გამო, რომელთა მოსმენამაც ქართული საზოგადოების უკმაყოფილება გამოიწვია. მერწმუნეთ, ჩემი პოზიცია ისეთივეა, როგორიც საქართველოს თითეული მოქალაქისა, რაც აფხაზ ხალხთან ჩვენი ისტორიული კავშირის აღდგენასა და ერთან ქვეყანაში თანაცხოვრებას გულისხმობს“.

თავის მხრივ, მმართველი პარტიის საარჩევნო შტაბში აღნიშნულ ბრალდებას კატეგორიულად უარყოფენ.

„სრული პასუხისმგებლობით ვაცხადებთ, რომ არ ვიცით ვინ არიგებს ამ ფლაერებს. მაგრამ ვინც ბრალდებას გვიყენებს, კეთილი ინებონ, ან დაამტკიცონ ეს ან ბოდიშის მოხდა მოუწევთ“, - აცხადებენ "ქართული ოცნების" შტაბში.

ამ დროისთვის ზუგდიდის მერობის ოთხი კანდიდატის ვინაობა ცნობილია. მმართველი გუნდიდან მერობისთვის ლაშა გოგია, ენმ-დან ლევან კონჯარია, „ევროპული საქართველოდან“, - ლელა ქებურია იბრძოლებენ, ზვიად სიჭინავა კი კენჭს, როგორც დამოუკიდებელი კანდიდატი იყრის.