ზუგდიდის რაიონულმა სასამართლომ სამი მამაკაცის მკვლელობაში ბრალდებულ დავით ბეჭვაიას აღმკვეთი ღონისძიების სახით წინასწარი პატიმრობა შეუფარდა. დაკავებული ბრალს არ აღიარებს და აცხადებს, რომ უდანაშაულოა. მისი თქმით, დაკავებისას სამართალდამცავებთან ბრალი "ემოციურ ფონზე" აღიარა.

ბრალდებულმა სასამართლო პროცესზე განაცხადა, რომ იგი დღეიდან უვადო შიმშილობას იწყებს.

ცნობისთვის, 10 თებერვალს სოფელ ურთაში სამი მამაკაცი დაიკარგა. ისინი მცირე მეწარმეები იყვნენ და ზუგდიდში მსხვილფეხა რქოსანი საქონლით ვაჭრობდნენ. გარდაცვლილებიდან ერთი ხობის მკვიდრია, ხოლო დანარჩენი ორი - ზესტაფონიდან იყვნენ.

12 თებერვალს შსს-ს პოლიციის თანამშრომლებმა სოფელ ნარაზენის მკვიდრი დავით ბეჭვაია დამამძიმებელ გარემოებაში განზრახ მკვლელობის ბრალდებით დააკავეს. უწყებაში მაშინ აცხადებდნენ, რომ ეჭვმიტანილმა დანაშაული აღიარა.

უწყების ცნობით, ბრალდებულმა მიმდინარე წლის 10 თებერვალს, ზუგდიდის რაიონის სოფელ აბასთუმანში, ხეცერის უბანში, ანგარების მიზნით, ცეცხლსასროლი იარაღიდან გასროლით თავისა და გულმკერდის არეში სასიკვდილო ჭრილობები მიაყენა სამ პირს და შემთხვევის ადგილიდან მიიმალა. სამივე დაჭრილი მამაკაცი ადგილზე გარდაიცვალა. 

გამოძიება დამამძიმებელ გარემოებაში განზრახ მკვლელობის ფაქტზე მიმდინარეობს (საქართველოს სსკ-ის 109-ე მუხლის მე-3 ნაწილის "ა" ქვეპუნქტით).