ქალაქ ზუგდიდის მუნიციპალიტეტის ცენტრალურ ბიბლიოთეკაში ჟურნალისტ და მთარგმნელ დავით კაკაბაძესთან შეხვედრა გაიმართა. შეხვედრაზე მის მიერ თარგმნილი მაქს ფრიშის უკანასკნელი ნაწარმოების- ,,ლურჯწვერას’’ წარდგენა მოხდა, მისი თარგმნის იდეა მას გამომცემლობა „ინტელექტის’’ მთვარმა რედაქტორმა ზვიად კვარაცხელიამ მიაწოდა.

„ლურჯწვერა“ ცნობილი მწერლისა და დრამატურგის, მე-20 საუკუნის შვეიცარიული ლიტერატურის კლასიკოსის მაქს ფრიშის ბოლო ნაწარმოებია. 1982 წელს გამოქვეყნებული ეს ფილოსოფიური რომანი მოიცავს საკუთარი თავის ძიებას და ადამიანის მომწყვდევას მისი იმ ხატის ჩარჩოებში, რომელსაც მის ირგვლივ მყოფნი ქმნიან.

,, ეს იყო სრულიად ბანალური ამბავი. ქმარს ადანაშაულებდნენ ცოლის მკვლელობაში. პროცესის მსვლელობაში ფრიშმა დაინახა, რამდენად აბსურდულია სასამართლო სისტემა საერთოდ და რამდენად ფორმალიზირებულია მთელი ეს პროცედურა და ამ შთაბეჭდილებით შექმნა მან ეს ნაწარმოები,’’- აღნიშნა კაკაბაძემ.

წიგნში აღწერილია სასამართლოს როლი ინდივიდის ცხოვრებაში, თუ როგორ შეიძლება სასამართლო სისტემა მივიდეს აბსურდამდე და დაანგრიოს ადამიანის ცნობიერება. მიუხედავად იმისა, რომ წიგნის გმირი უდანაშაულოა, ის კომპლექსებით შეპყრობილი პიროვნებაა, რომელსაც უჭირს უდანაშაულობის ბოლომდე გააზრება.

დავით კაკაბაძემ ასევე ისაუბრა თავის პროფესიულ გამოცდილებაზე და გაიხსენა თავისი პირველი ნაბიჯები ჟურნალისტიკაში. ის 1993 წლიდან მუშაობს რადიო "თავისუფლების" ქართულ ბიუროში, 2005 წლიდან კი ამ სამსახურის ხელმძღვანელია.