აშშ-ის ფინანსთა სამინისტროს მაღალჩინოსანმა რუსეთის პრეზიდენტი ვლადიმირ პუტინი კორუფციაში ღიად დაადანაშაულა. ადამ შუბინმა ეს განცხადება ბრიტანული ტელეკომპანია "ბი ბი სი"-ს ეთერში გასულ ფილმში "პუტინის საიდუმლო სიმდიდრენი" გააკეთა.

შუბინი, რომელიც უწყებაში სანქციებისა და ტერორიზმის საკითხებს კურირებს, ამბობს, რომ პუტინი კორუმპირებული პრეზიდენტია და ამერიკის ხელისუფლებამ ამის შესახებ დიდი ხანია იცის.

"ჩვენ ვხედავდით, როგორ ამდიდრებდა ის თავის მეგობრებსა და ახლო მოკავშირეებს", - განაცხადა შუბინმა.

მისივე თქმით, პრეზიდენტი სავარაუდოდ, 110 ათას დოლარს გამოიმუშავებს წელიწადში, თუმცა ეს ციფრი რეალურად არ ასახავს მისი ქონების ოდენობას.

ამასთან, მან არ გააკეთა კომენტარი აშშ-ის მთავარი სადაზვერვო სამმართველოს 2007 წელს გამოქვეყნებულ ანგარიშზე, რომლის თანახმად, პუტინის ქონება 40 მილიარდ დოლარს შეადგენდა.

თავის მხრივ, რუსეთის პრეზიდენტის პრეს-მდივანმა დიმიტრი პესკოვმა ამ განცხადებებს "წმინდა წყლის გამონაგონი" უწოდა.