დედაქალაქის საკრებულო თბილისის მთავრობის ახალ შემადგენლობას, მათ შორის მერის მოადგილეებს, დღეს დაამტკიცებს. თბილისის მერის პირველი მოადგილის თანამდებობაზე წარდგენილია კულტურის მინისტრის ყოფილი მოადგილე ალექსანდრე მარგიშვილი, თბილისის მერის მოადგილეებად კი დასახელებული არიან ნინა ხატისკაცი, გიორგი ხელაია, გიორგი სოლომონია და ალუდა გოგლიჩიძე. დავით ნარმანიას შეფასებით, ყველა მათგანი პროფესიონალიზმის, მაღალი კვალიფიკაციისა და მრავალმხრივი სამუშაო გამოცდილების მიხედვით შეარჩია. რაც შეეხება, თბილისის რაიონების გამგებლებს, საბურთალოს გამგებლად წარდგენილია ბექა მიქაუტაძე, ვაკის გამგებლად - გივი ჭიჭინაძე, მთაწმინდის გამგებლად - გელა არჩვაძე, ჩუღურეთის გამგებლად - ზურაბ ჩიკვილაძე, დიდუბის გამგებლად - ირმა ზავრადაშვილი, ნაძალადევის გამგებლად _ ზაზა გაბუნია, გლდანის გამგებლად - ბესიკ ქარცივაძე, კრწანისის გამგებლად - გიორგი კოპალეიშვილი, ისნის გამგებლად - ვახტანგ ქიზიყურაშვილი, სამგორის გამგებლად კი - მამუკა ჩოქური. დედაქალაქის მერია დღეს საქალაქო სამსახურების უფროსებსაც დაამტკიცებს. საკრებულოს ოპოზიცია თბილისის მთავრობის შემადგენლობას მხარს არ დაუჭერს. როგორც "ნაციონალური მოძრაობის" წარმომადგენელმა ირაკლი აბესაძემ განაცხადა, წარდგენილი კანდიდატები ვერ შეასრულებენ იმ დანაპირებს, რომელიც მათ თბილისელებს მისცეს.