ქალაქ ზუგდიდის მერსა და საკრებულოს წევრ ანა წითლიძეს შორის სიტყვიერი დაპირისპირება გამოიწვია ზუგდიდის მოსწავლე ახალგაზრდული სასახლის ბენდის დაფინანსების თემამ. წითლიძემ სხდომაზე განაცხადა, რომ ბენდის დაფინანსების საკითხი საკრებულოს სხდომაზე „ნაციონალური მოძრაობის“ ძალისხმევით იყო გატანილი და არც ერთ ინფორმაციაში ამის შესახებ ნათქვამი არ ყოფილა.
„მე მგონი მერიის მხრიდან ძალიან უხერხულია, როდესაც ამას ასე ტაშ-ფანდურით აპიარებთ და ერთი სიტყვაც არ არის ნათქვამი, თუ საიდან წამოვიდა ეს საკითხი“- თქვა საკრებულოს სხდომაზე ანა წითლიძემ.
ქალაქის მერ ირაკლი გოგოხიასა და ანა წითლიძეს შორის სიტყვიერი დაპირისპირება, ბენდ „ზუგდიდის“ ერთ-ერთი წევრის დაფინანსების საკითხს მოჰყვა.
„ჩვენთან შემოვიდნენ განცხადებით დაგვეფინანსებინა ბენდი, 15 წევრამდე, 300-300 ევროთი, ამის ფუფუნება მერიას არ ჰქონდა და შემდეგ შეირჩა ორი სოციალურად დაუცველი და წამყვან პოზიციებზე, რომ უკრავდა ისეთი ბავშვები. ბოლოს დარჩა ერთ ბავშვი , რომელიც ასევე რამდენიმე ინსტრუმენტზე უკრავდა. ამაზე შემოვიდნენ განცხადებით, დაგვეფინანსებინა 50%-ით“, – განაცხადა ირაკლი გოგოხიამ.
„ბატონო ირაკლი, როდესაც თქვენ ამბობთ, ამ კონკრეტულ შემთხვევაზე, 50%-ის დაფინაანსება მოითხოვესო, იტყუებით! თქვენ შესთავაზეთ იქით 50%-იანი დაფინასება“, – უთხრა ანი წითლიძემ ირაკლი გოგოხიას.
ამის შემდეგ ქალაქის მერმა ირაკლი გოგოხიამ, ანა წითლიძეს ზრდილობისკენ მოუწოდა და საკრებულოს სხდომის დარბაზი დატოვა.
ასევე, მცირე სიტყვიერი შელაპარაკება მოხდა ანა წითლიძესა და საკრებულოს თავმჯდომარის მოადგილე გიორგი თოდუას შორის.
ქალაქ ზუგდიდის მერმა ირაკლი გოგოხიამ,ბულგარეთის ქალაქ ვარნაში გამართულ ფესტივალზე გამარჯვებულ ბენდ „ზუგდიდს“ საკრებულოს დარბაზში 2 სექტემბერს უმსასპინძლა და სიგელები გადასცა.
მასალის გამოყენების პირობები