ზუგდიდის ისტორიულ-ეთნოგრაფიული მუზეუმიდან ღვთისმშობლის კვართი დილიდან ზუგდიდის მშენებარე ტაძარში გადააბრძანეს. ამავე ტაძარში ფერისცვალების დღესასწაულთან დაკავშირებით საზეიმო წირვა-ლოცვა დასრულდა.საზეიმო წირვა-ლოცვას ქვეყნის სხვადასხვა ეპარქიის წარმომადგენლები დაესწრნენ. აქვე იყვნენ წმინდა სინოდის წევრებიც. ღვთისმშობლის კვართის გამოსვენებას სასულიერო პირები საფრთხის მოახლოებას უკავშირებდნენ. ვლაქერნის ღვთისმშობლის ხატის სახელობის ტაძრის დეკანოზის მამა მალხაზ ჭანტურიას განცხადებით საფრთხეს აღვირახსნილობასა და გარყვნილებაში ხედავს. “კაზანტიპის” სახით დეკანოზი სოდომური ცოდვის მოახლოებაზე მიგვანიშნებს.“საფრთხე იმაში მდგომარეობს, რომ აღვირახსნილობაა, გარყვნილებაა, სოდომური ცოდვებია. ეს კი მძიმე შედეგებს მოიტანს ჩვენი ერისთვის, ქვეყნისთვის, ჩვენი მომავალი თაობისთვის. ეკლესია კიდევ ერთხელ მოუწოდებს თავის სულიერ შვილებს, ივერიის კურთხეული მიწის მცხოვრებლებს, რომ მაქსიმალურად თავი შეიკავონ ამ ე.წ. კაზანტიპის ფესტივალში მონაწილეობის მიღებისგან“, – განაცხადა დეკანოზმა მამა მალხაზმა.ზუგდიდის მშენებარე ტაძარში საზეიმო წირვა-ლოცვის დასრულების შემდეგ, წმინდა სინოდის წევრები და მრევლი ანაკლიისკენ გაემართება,სადაც პარაკლისი 15 საათზე გაიმართება. კაზანტიპის საწინააღმდეგო გამოსვლების მიუხედავად, ანაკლიაში ფესტივალისთვის მზადება არ შეფერხებულა. აქ უკვე ჩაატარეს გენერალური რეპეტიცია და გასულ ღამეს გამოცვალეს ლაზერშოუსთვის საჭირო აპარატურა. ორგანიზატორებისთვის დამსვენებლების მისაღებად უკვე მზად არიან. უკვე მეორე დღეა ზუგდიდი-ანაკლიის გზაზე შეზღუდვები დაწესდა. საკურორტო ზონაში შესვლა მხოლოდ სპეციალური საშვებითაა შესაძლებელი ავტომანქანებისთვის. მოქალაქეს კი ე.წ. ვიზა დასჭირდება „კაზანტიპის რესპუბლიკად“ წოდებულ ტერიტორიაზე მოსახვედრად.