ავაიაკომპანია Wizz Air-ი ამაღამ ბუდაპეშტიდან ქუთაისის საერთაშორისო აეროპორტის მიმართულებით პირველ ავიარეისს შეასრულებს. ავიაკომპანია ქუთაისიდან ბუდაპეშტის მიმართულებით კვირაში ორჯერ, ოთხშაბათსა და პარასკევს იფრენს. ეკონომიკის სამინისტროს ინფორმაციით, Wizz Air პირველი დაბალბიუჯეტიანი ავიაკომპანიაა, რომელმაც ქუთაისის საერთაშორისო აეროპორტიდან ავიარეისების შესრულება 2012 წელს, ქუთაისის საერთაშორისო აეროპორტის გახსნის დღეს დაიწყო. პირველი ავიარეისი Wizz Air-მა ქუთაისის საერთაშორისო აეროპორტიდან კიევის მიმართულებით შეასრულა, რასაც მოჰყვა ვარშავა, კატოვიცე, ლვოვი, ხარკოვი, დონეცკი, ვილნიუსი, მოსკოვი, თელ-ავივი სხვადასხვა ავიაკომპანიების შესრულებით. 2014 წლის იანვრიდან სექტემბრის ჩათვლით ქუთაისის საერთაშორისო აეროპორტი უკვე 178.574 მგზავრს მოემსახურა, ხოლო 2013 წელს აეროპორტით 188.682 მგზავრმა ისარგებლა. ახალი ავიარეისის გახსნასთან ერთად, საქართველოს აეროპორტების გაერთიანება ქუთაისის საერთაშორისო აეროპორტის ოპერირების ორ წელს აღნიშნავს. ამჟამად აეროპორტში რეისებს ხუთი ავიაკომპანია (Wizz Air, S7, Ural Airways, Belavia, Georgian Airways) ახორციელებს. 2012 წლიდან დღემდე ქუთაისის საერთაშორისო აეროპორტი 380.172 მგზავრს მოემსახურა. ბუდაპეშტიდან ქუთაისის საერთაშორისო აეროპორტის მიმართულებით, ამაღამ პირველი ავიარეისი 00:15 საათზე შესრულდება.