საქართველოს მორაგბეთა ეროვნული ნაკრები ნოემბრის საერთაშორისო ტესტ-მატჩების სერიის პირველ შეხვედრას დღეს, 17 ნოემბერს, გამართავს. ქართველი მორაგბეები თბილისში, მიხეილ მესხის სახელობის სტადიონზე იაპონიის ნაკრებს უმასპინძლებენ. მატჩი 15:00 საათზე დაიწყება. ბორჯღალოსნები უკვე ერთი კვირაა რაც შევარდენის სანაკრებო ბაზაზე გადიოდნენ შეკრებას. მთავარ მწვრთნელ მილტონ ჰეიგს უკანა ხაზის გაწვრთნაში ლეგენდარული ახალ ზელანდიელი ტანა უმაგა ეხმარებოდა. ნოემბრის ტესტ მატჩებისთვის ხელმძღვანელობამ ეროვნულ გუნდში 31 მოთამაშეს გამოიძახა. თამაშამდე 48 საათით ადრე საქართველოს ნაკრების სამწვრთნელო შტაბმა დაასახელა 23-კაციანი გადანომრილი შემადგენლობა. ტრავმებისა და სხვა მიზეზების გამო შეხვედრას გამოტოვებენ გიორგი ჩხაიძე, ვასილ კაკოვინი, ანტონ ფეიქრიშვილი, ლაშა მალაღურაძე და დიმიტრი ბასილაია.  სასტარტო შემადგენლობაში არიან ნაკრების ყველაზე მეტი ლელოს ავტორი ირაკლი მაჩხანელი, ყველაზე შედეგიანი მოთამაშე და ყველაზე მეტი ქულის მომპოვებელი მერაბ კვირიკაშვილი და გუნდის ლიდერი მამუკა გორგოძე. ასევე სასტარტო შემადგენლობაშია 35 წლის კაპიტანი ირაკლი აბუსერიძე, რომელიც ნაკრების შემადგენლობაში დღეს 83-ე მატჩს გამართავს და ამ მხრივ ეროვნული გუნდის რეკორდსმენია. IRB-ის მსოფლიო რეიტინგში საქართველოს ნაკრები დღეისათვის 67,95 ქულით 16-ე პოზიციაზეა, ხოლო მეტოქე იაპონიის ნაკრები 68,89 ქულით ერთი საფეხურით მაღლა იმყოფება და 15-ე ადგილს იკავებს.