საბურთალოზე, ამაღლების სახელობის ტაძარში სადღესასწაულო ლიტურგია დასრულდა. მსახურების დროს უწმინდესმა მრევლს ტრადიციული ქადაგებით მიმართა და ამაღლების და ტაძრის დღესასწაული მიულოცა. უწმინდესის თქმით, უფალი სულიერ სიხარულს ანიჭებს ადამიანს. პატრიარქმა წმინდა სახარებიდან ის ადგილი გაიხსენა, სადაც უფლის ამაღლებაზეა საუბარი და დღესასწაულის მნიშვნელობაზე ისაუბრა. პატრიარქის თქმით, სახარებაში ნათქვამია, რომ უფალი აღდგომის შემდეგ ეცხადებოდა მოციქულებს და ყოველ შეხვედრაზე მიანიჭებდა მათ მშვიდობას. "მშვიდობა თქვენთანა" – მიმართავდა მათ უფალი. ეს მშვიდობა გადმოდის დღეს საქართველოზე და მადლობა უფალს მისი დიდი წყალობისთვის", - აღნიშნა უწმინდესმა. პატრიარქის თქმით, უფალმა მოციქულები იერუსალიმიდან ელეონის მთაზე გაიყვანა და ზეცად ამაღლებამდეც "მშვიდობა თქვენთანა" ამ სიტყვებით მიმართა. პატრიარქის თქმით, მოციქულები დაბრუნდნენ იერუსალიმში დიდი სიხარულით. "იმ დროს თითქოს მწუხარება უნდა ყოფილიყო მათთან, რადგან მაცხოვარს დაშორდნენ, მაგრამ მათ ახსოვდათ იესო ქრისტეს სიტყვები "მე თქვენთან ვარ ვიდრე აღსასრულამდე". ეს სიხარული გადმოდის თაობიდან თაობამდე. ეს სულიერი სიხარული გვათბობს ჩვენ. ამდენ განსაცდელს ადამიანი ვერ გაუძლებდა. მადლი ღვთისა და სიხარული არის შედეგი სიყვარულისა. თუ სიყვარული არ აქვს ადამიანს, არც სიხარული არ ექნება. ყოველ ნაბიჯზე ვგრძნობთ მის წყალობას, მის მოწყალებას, როგორ ეხმარება ადამიანს უფალი. ხშირ შემთხვევაში მწუხარება სიხარულად გარდაიქმნება. ჩვენ თაყვანს ვცემთ უფალს, რომელიც გვაძლევს სიხარულსა და მადლს", - ბრძანა უწმინდესმა. პატრიარქმა გაიხსენა ამაღლების ტაძრის მშენებლობის ისტორიაც და მისი აღმშენებელი მამა ნიკოლოზი, ტაძრის წინამძღვარი დეკანოზი კახაბერი კი, მეორე გამშვენებული ოქროს ჯვრის ტარების უფლებით დააჯილდოვა. "შევთხოვთ უფალს, არ მოგაკლოთ სიხარული და სიყვარული, რომ თქვენს ოჯახებში, საქართველოსა და მთელ მსოფლიოში სუფევდეს სიხარული და სიყვარული", - აღნიშნა პატრიარქმა.