საბერძნეთიდან საქართველოში ფულადი გზავნილები გაურკვეველი ვადით შეჩერდა. დღეიდან, მინიმუმ ერთი კვირის მანძილზე, საბერძნეთში ბანკები არ იმუშავებენ. ამ დროის მანძილზე, საბერძნეთის საფონდო ბირჟაც დაკეტეილი იქნება. დღეიდან, ერთი კვირის მანძილზე, მოსახლოებას ბანკომატებიდან ყოველდღიურად მხოლოდ 60 ევროს გამოტანის უფლება აქვთ. ბანკომატებთან დილიდან რიგები დგას.

სხვადასხვა მონაცემებით, საბერძნეთში 150 ათასიდან 200 ათასამდე საქართველოს მოქალაქე ცხოვრობს ისინი საკუთარი შემოსავლების დიდ ნაწილს - საქართველოში გზავნიან.

ქვეყნის პრემიერმინისტრმა ალექსის ციპრასმა ეკონომიკურ კრიზისთან დაკავშირებით 5 ივლისს რეფერენდუმი დანიშნა, რომელზედაც ბერძნულმა საზოგადოებამ უნდა გადაწყვიტოს თუ როგორი ეკონომიკური პოლიტიკა ექნება მომავალში ქვეყანას.

საბერძნეთს მისი კრედიტორების მიმართ 317 მილიარდი ევროს მოცულობის ვალი აქვს. ევროპის ცენტრალური ბანკი და საერთაშორისო სავალუტო ფონდი სესხის რესტრუქტურიზაციაზე თანახმა არიან, თუკი საბერძნეთი დაუყოვნებლივ გაატარებს ეკონომიკურ რეფორმებს, რაზეც საბერძნეთის მმართველი პარტია სირიზა წინააღმდეგია.