ზუგდიდის  შალვა დადიანის სახელობის პროფესიული სახელმწიფო თეატრს ახალი სამხატვრო ხელმძღვანელი ჰყავს. ამ პოსტზე რეჟისორი გიორგი კაშია დაინიშნა.

როგორც საქართველოს კულტურისა და სპორტის სამინისტრო განმარტავს, "პროფესიული თეატრების შესახებ" საქართველოს კანონის შესაბამისად, იგი თეატრს მიმდინარე წლის 22 აპრილიდან ოთხი წლის განმავლობაში უხელმძღვანელებს.

"გიორგი კაშიამ დადგა სპექტაკლები: დავით კლდიაშვილის "ირინეს ბედნიერება"(2023), ფედერიკო გარსია ლორკას "ბერნარდა ალბას სახლი" (2017), დავით კლდიაშვილის "დარისპანის გასაჭირი" (2018), ერიკ ემანუელ შმიტის "ოსკარი და ვარდისფერი ქალბატონი" (2019), თავისივე "ბოლო სამუშაო დღე" (2019), "აღმოსავლეთისკენ" (2020) და "ომი ომია" (2020), ნიკოლოზ წულუკიძის "ჯადოსნური წრე" (2021), ნუგზარ ლორთქიფანიძის "თქვენო უდიდებულესობავ" (2021), ანდრია ვაჭრიძის "ანდერძი" (2022), ბერტოლდ ბრეხტის "სეჩუანელი კეთილი ადამიანი" (2023), ოსკარ უაილდის "სალომეა" (2023)", - მითითებულია ინფორმაციაში.

იქამდე, 2019 წლიდან ზუგდიდის თეატრს რეჟისორი ლაშა შეროზია ხელმძღვანელობდა. მას გასული წლის ოქტომბერში პოზიციაზე ყოფნის ვადა ამოეწურა  და თეატრი რამდენიმე თვე სამხატვრო ხელმძღვანელისა და დირექტორის გარეშე იყო დარჩენილი. სამხატვრო ხელძღვანელის მოვალეობას დროებით ემა ლაშხია ასრულებდა.

კულტურის სამინისტრომ 2023 წლის 31 ოქტომბერს აღნიშნულ პოზიციაზე გამოცხადებული კონკურსი ჩაშალა.

სამინისტროს ოფიციალურ ფეისბუქ გვერდზე მიზეზად "უფრო ჯანსაღი კონკურენციისთვის თანაბარი პირობების შექმნა" დასახელდა, თუმცა უწყებას დამატებითი ინფორმაცია არ გაუვრცელებია. მოგვიანებით კი, ამავე პოსტზე კონკურსი კვლავ გამოაცხადა.


ამავე თემაზე: 

ზუგდიდის თეატრს ისევ არ ჰყავს სამხატვრო ხელმძღვანელი და დირექტორი

რატომ ჩაიშალა ზუგდიდის თეატრის სამხატვრო ხელმძღვანელის შესარჩევი კონკურსი - სტანდარტული პროცედურა თუ მიზანმიმართული ქმედება

ისევ უცნობია, ვინ გახდება ზუგდიდის თეატრის სამხატვრო ხელმძღვანელი

ზუგდიდის დრამატული თეატრის ხელმძღვანელის პოსტზე კონკურსი ხელახლა გამოცხადდა

ზუგდიდის დრამატული თეატრის ხელმძღვანელის პოსტზე კონკურსი გამოცხადდა