სოხუმი არ განიხილავს ტურისტული საქმიანობის შესახებ მოქმედ "კანონმდებლობაში" ცვლილების შეტანის საკითხს, - ამის შესახებ აფხაზეთის თვითგამოცხადებული რესპუბლიკის ე.წ პრემიერ-მინისტრმა ალექსანდრე ანქვაბმა "გიდების პროფესიული საზოგადოების" წარმომადგენლებთან შეხვედრაზე განაცხადა.
დე ფაქტო მთავრობის პრესსამსახურის ცნობით, შეხვედრაზე განიხილეს "ტურიზმის ინდუსტრიის წარმომადგენლების შეშფოთების საკითხები", კერძოდ, "აფხაზეთში არააკრედიტებული გიდებისა და ექსკურსიების უკანონო საქმიანობა".

"აფსნიპრესის" თანახმად, საბაჟო და სასაზღვრო სამსახურების ხელმძღვანელების ინფორმაციით, "ფსოუს გამშვები პუნქტის გავლით აფხაზეთში რეგისტრირებული მანქანების გადაადგილების სირთულეები მხოლოდ მოძრაობის ნაკადის სეზონურ ზრდას უკავშირდება".

გასულ კვირას სოციალური ქსელების აფხაზურ სეგმენტში გავრცელდა ინფორმაცია, რომ თითქოს "მინისტრთა კაბინეტი" ამზადებდა შეთანხმებას, რომლის ფარგლებშიც, რუსი გიდები ლეგალურად შეძლებდნენ მუშაობას ოკუპირებულ აფხაზეთში, რამაც ადგილობრივების უკმაყოფილება გამოიწვია.