დღეს, საქართველოს ეროვნული საფეხბურთო ნაკრები გერმანიაში, გელზენკირხენის "აუფ შალკე არენაზე" ევრო 2024-ის ჯგუფური ეტაპის ბოლო მატჩს პორტუგალიასთან გამართავს. შეხვედრა თბილისის დროით 23:00 საათზე დაიწყება.

ჩემპიონატის ფლეი ოფში სათამაშოდ, ქართველმა ფეხბურთელებმა უნდა დაამარცხონ პორტუგალიელები, ფრედ დასრულების შემთხვევაში კი, შემდეგ ეტაპზე გადასვლის მცირე, თუმცა თეორიული შანსი მაინც არსებობს.

"პორტუგალია ძლიერი გუნდია და თუ მცირე შანსი მაინც იქნება, მას გამოვიყენებთ. აქ ყოფნაც დიდი გამარჯვებაა. ვინმეს რომ ეთქვა, ბოლო ტურის წინ მერვედფინალში გასვლის შანსი გვექნებოდა, ვერ დავიჯერებდი. ოთარ კიტეიშვილი პირველ ორ მატჩში ფორმაში არ იყო, მაგრამ ახლა მზად იქნება. ჩვენ ვცდილობთ, მაქსიმუმი გავაკეთოთ", - ამბობს ვილი სანიოლი, საქართველოს ნაკრების მწვრთნელი.

შეგახსენებთ, საქართველოს ნაკრები 18 ივნისს თურქეთთან ანგარიშით 3:1 დამარცხდა, ხოლო ჩეხეთთან შეხვედრა თანაბარი ქულით 1:1 დაასრულა.

საქართველო ისტორიაში პირველად ასპარეზობს ევროპის ჩემპიონატზე. მატჩის დიდ ეკრანებზე ტრანსლაცია ქვეყნის მასშტაბით, სხვადასხვა ქალაქში გაიმართება. ზუგდიდში მე-2 სკოლის წინ გულშემატკივრებს ღია სივრცეში შეუძლიათ შეხვედრის ყურება, ასევე, ტრანსლირება ბოტანიკური ბაღის საკონფერენციო დარბაზში, ზუგდიდი მოლში და სოციალურ კაფე "მეგობარში" მოეწყობა.


ამავე თემაზე: 

დღეს სამეგრელოს სხვადასხვა მუნიციპალიტეტში ევროპის ჩემპიონატის ტრანსლაცია გაიმართება

ზუგდიდში სხვადასხვა ლოკაციაზე ევრო 2024-ს მატჩის დიდ ეკრანზე ყურებას შეძლებთ