მარტვილის მცხოვრებმა შორენა ფონიავამ „სერვისების განვითარების სააგენტოს“ წინააღმდეგ სასამართლო დავა მოიგო. ამის შესახებ ინფორმაცია „საერთაშორისო გამჭვირვალობა - საქართველომ“ გამოაქვეყნა.

ორგანიზაციის ცნობით, მოქალაქის სარჩელი ეხებოდა „სერვისების განვითარების სააგენტოდან“ მის უკანონო გათავისუფლებას.

TI - საქართველოს იურისტი და სასამართლოში მომჩივნის ადვოკატი ვიქტორ კვიტატიანი რადიო „ათინათთან“ ამბობს, რომ თავდაპირველად, სარჩელი სენაკის რაიონულ სასამართლოში დაკმაყოფილდა, შემდეგ კი აპელაციისას, მოპასუხე მხარემ ფონიავას ინტერესების დამცველს განაცდურის ანაზღაურება და პოზიციაზე აღდგენის წინადადება შესთავაზა, რაზეც მომჩივანი დასთანხმდა.

„სასამართლოზე არგუმენტი იყო ის, რომ სააგენტოში რეორგანიზაცია არასწორად ჩატარდა. სწორედ მის საფუძველზე გათავისუფლდა შორენა ფონიავა. რეორგანიზაცია ისე ჩატარდა, რომ ფონიავას სამსახურიდან გაშვებას მოარგეს მთელი პროცესი, ეგ იყო მიზანი. ეს გადაწყვეტილება გავასაჩივრეთ. დავუმტკიცეთ, რომ შორენა ფონიავა არ იყო ის კანდიდატი, ვისი გაშვებაც აუცილებელი იყო რეორგანიზაციის შედეგად. მოპასუხეს, „სერვისების განვითარების სააგენტოს“ შეეძლო ფონიავა სხვა პოზიციაზე დაენიშნა ან შეეთავაზებინა სხვა პოზიცია, რაც არ გააკეთა. ეს დავანახეთ სასამართლოს, პირველი ინსტანცია მოვიგეთ, შემდეგ კი თვითონ წამოვიდნენ დათმობაზე, რადგან აშკარა იყო, რომ სასამართლოზე ჩვენ დადებითი შედეგი გარანტირებული გვქონდა“, - ამბობს იურისტი.

ორგანიზაციაში განმარტავენ, რომ ფონიავა აღადგინეს სამეგრელო-ზემო სვანეთის სამოქალაქო რეესტრის მთავარი სპეციალისტის პოზიციაზე გაზრდილი ხელფასით,ხოლო კომპენსაციის სახით, 10 000 ლარი გადაუხადეს.


ფოტო: საერთაშორისო გამჭვირვალობა - საქართველო