სტატისტიკის ეროვნული სამსახურის ინფორმაციით, 2024 წლის მეორე კვარტალში (აპრილი, მაისი, ივნისი), წინა წლის შესაბამის პერიოდთან შედარებით, უმუშევრობა 3.1%-ით შემცირდა და 13.7% გახდა.

საქსტატის ცნობით, დაქირავებულთა რიცხვი გაიზარდა 19 100 კაცით (2.1%) და 935 800-ს მიაღწია, ხოლო თვითდასაქმებულთა რაოდენობამ 41 300-ით მოიმატა (10.1%) და 451 500 შეადგინა. ამავე პერიოდში უმუშევართა რიცხვი 47 200-ით შემცირდა (17.7%) და 219 700 გახდა.

„2024 წლის II კვარტალში, წინა წლის შესაბამის პერიოდთან შედარებით, უმუშევრობის დონე საქალაქო ტიპის დასახლებებში შემცირებულია 3.5%-ით, ხოლო სოფლის ტიპის დასახლებებში - 2.5%-ით“, - აღნიშნულია ინფორმაციაში.

მონაცემების მიხედვით, უმუშევრობის დონე ტრადიციულად მაღალია კაცებში, ქალებთან შედარებით. სამ თვეში აღნიშნული მაჩვენებელი ქალებში 3.6%-ით, კაცებში კი - 2.6%-ით შემცირდა.