აფხაზეთიდან დევნილმა ნარგიზა ქურდიანმა ჯანდაცვის სამინისტროს დაქვემდებარებულ სსიპ-ს, "დევნილთა, ეკომიგრანტთა და საარსებო წყაროებით უზრუნველყოფის სააგენტოს" თბილისის საქალაქო და სააპელაციო სასამართლოში დავა მოუგო. ამის შესახებ ინფორმაცია „საერთაშორისო გამჭვირვალობა - საქართველოს“ სოციალურ ქსელში გამოქვეყნდა.

TI - საქართველოს იურისტმა და სასამართლოში მომჩივნის ადვოკატმა ვიქტორ კვიტატიანმა რადიო „ათინათს“ უთხრა, რომ ქურდიანი თბილისის სტუდქალაქში, ავარიულ კორპუსში ცხოვრობს, რომელსაც უკვე კერძო მესაკუთრე გამოუჩნდა და მან იქ მაცხოვრებელი დევნილების განსახლება მოითხოვა.

„ამის შემდეგ, დევნილები კრიტერიუმის გარეშე უნდა დაკმაყოფილებულიყვნენ ახალი საცხოვრებელი ფართებით. ამაზე ნარგიზა ქურდიანს უარი უთხრა კომისიამ იმიტომ, რომ იმ კონკრეტულ მომენტში, როცა კომისია მივიდა, მომჩივანი სახლში არ დახვდა. ეს ქალბატონი 84 წლისაა, მას ჯანმრთელობის პრობლემები აქვს და მკურნალობს. ამ პერიოდში, ის იმყოფებოდა თავის შვილთან რუსთავში და ვერ დახვდა კომისიას. ამ საფუძვლით უთხრეს უარი კრიტერიუმის გარეშე საცხოვრებელი ფართის გადაცემაზე. ეს გავასაჩივრეთ სასამართლოში და მათ სრულად გაიზიარეს ჩვენი არგუმენტები. სასამართლომ ჯანდაცვის სამინისტროს ქურდიანის საცხოვრებელი ფართით უზრუნველყოფა დაავალა“, - განმარტავს იურისტი.

მისივე თქმით, ქურდიანი, დაახლოებით, 30 წელია, რაც აღნიშნულ მისამართზე ცხოვრობს, თუმცა ახლა კორპუსი იმდენად ავარიულია, რომ იქ გაჩერება რთულია და, მისი ჯანმრთელობის მდგომარეობის გათვალისწინებით, ის პერიოდულად შვილის საცხოვრებელ სახლში გადადის.


ფოტო: საერთაშორისო გამჭვირვალობა - საქართველო