სოხუმში აცხადებენ, რომ „აფხაზეთის გაეროში გაწევრიანება სურთ“. ამის შესახებ დე ფაქტო რესპუბლიკის ე.წ. საგარეო საქმეთა მინისტრმა სერგეი შამბამ რუსულ „იზვესტიას“ უთხრა.
“რა თქმა უნდა, აფხაზეთის რესპუბლიკის საბოლოო მიზანი გაეროში გაწევრიანებაა. ეს ჩვენი ქვეყნის ფართო საერთაშორისო აღიარების პროცესის საბოლოო მიზანია, ეს ყველაფერი ერთმანეთთან ლოგიკურ ურთიერთკავშირშია. ცხადია, ჩვენ მშვენივრად გვესმის, რომ ეს ძალიან რთული პროცესია, და ორმაგი სტანდარტების პოლიტიკა, რომელსაც ჩვენ ვაწყდებით, არავის გაუუქმებია“, - განაცხადა მან.

შამბას თქმით, „აფხაზეთს აქვს უარყოფითი გამოცდილება“, როდესაც აშშ და მისი პარტნიორები აგრძელებდნენ მნიშვნელოვან ზეწოლას იმ ქვეყნებზე, რომლებთანაც „აფხაზეთს უკვე ჰქონდა დამყარებული დიპლომატიური ურთიერთობა“.

ამიტომაც, მისივე განმარტებით, ახლა ისინი ცდილობენ მსოფლიოს იმ რეგიონების ქვეყნებთან დაამყარონ კონტაქტები, რომლებზეც „დასავლეთის ქვეყნებს არ აქვთ მნიშვნელოვანი გავლენა და არ შეუძლიათ ზეწოლა ამა თუ იმ ქვეყანაზე“.
შამბამ იმედი გამოთქვა, რომ განჭვრეტად მომავალში გაიზრდება იმ ქვეყნების რაოდენობა, რომლებიც „აფხაზეთის დამოუკიდებლობას აღიარებენ“.

აგვისტოს ბოლოს სოხუმში განაცხადეს, რომ „აფხაზეთში რუსეთის საელჩო“ აწარმოებს დიალოგს რუსეთში მყოფ რამდენიმე დიპლომატიურ მისიასთან, „რესპუბლიკის დამოუკიდებლობის აღიარების“ თაობაზე. 

გაეროს წევრად სახელმწიფოს მიღება ხდება გაეროს უშიშროების საბჭოს რეკომენდაციით გენერალური ასამბლეის მიერ.

საქართველო გაეროში 1992 წლის ივლისში გაწევრიანდა.

საქართველოს აფხაზეთისა და ცხინვალის რეგიონები რუსეთმა 2008 წლის აგვისტოს ომის შემდეგ დამოუკიდებელ ქვეყნებად აღიარა, იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირია.