ანგელინა გადელია, რომელიც 15 წელია დიორამებს, სიუჟეტების სამგანზომილებიან მინიატიურებსა და თოჯინებს ქმნის, ლონდონის "Dollhouse Festival"-ის მონაწილეა.

როგორც ის რადიო "ათინათს" უყვება, ლონდონის ფესტივალი საკმაოდ პრესტიჟული სივრცეა, მასში ცნობილი, წარმატებული ხელოვანები მონაწილეობენ და ბედნიერია ამ შესაძლებლობისთვის.

"მე საკუთარ სახლში, პატარა სამზარეულოში ვქმნი ნამუშევრებს. ჩემმა შვილმა მათი ფოტოები ლონდონში, ამ გამოფენის ვებ გვერდზე გააგზავნა. ამის შესახებ მე არ ვიცოდი. მათგან დადებითი შეფასება რომ მიიღო, რა თქმა უნდა, გაკვირვებული და ბედნიერი ვიყავი. ორგანიზატორებმა მთხოვეს, ლონდონში ჩავსულიყავი, თუმცა ეს დიდ ფინანსურ სახსრებს მოითხოვდა და ამ ეტაპზე ვერ შევძელი გამგზავრება, მაგრამ მომავალი წლისთვის, დაფინანსების წყაროს მოვიძიებ და აუცილებლად წავალ, ახალი ნამუშევრით წარვდგები დამთვალიერებლების წინაშე ", - ამბობს ის.

მისი თქმით, ამ ეტაპზე, დიორამა, რომელიც ბავშვობის მოგონების ელემენტებით შექმნა, 23 000 ფუნტადაა შეფასებული და ონლაინ გამოფენაზე იყიდება.

შეკითხვაზე, რა არის სამუშაო პროცესის ყველაზე საინტერესო ნაწილი, გვეუბნება, რომ გონებაში მოფიქრებული სიუჟეტი და შთაგონება მინიატიურის დამზადების წინ გამოწვევას ჰგავს, რაც მისთვის ამაღელვებელია.

"ეს ერთგვარი არტ თერაპიაა. მე ბავშვობიდან მჭიდრო დამოკიდებულება მაქვს ზოგადად ხელოვნებასთან. გონებაში ვქმნი სიუჟეტს, ვიცი, რომ იქ შეზღუდული არ ვარ ვიცი, ხოლო მისი პრაქტიკაში გადმოტანა რთულია და ამიტომ მიმაჩნია გამოწვევად, აზარტად. პროცესი კი ძალიან აქტიურია. მხოლოდ ნამუშევრის დასრულების შემდეგ ვაანალიზებ მის დადებით შედეგს", - დასძენს იგი.

სამომავლოდ, ნაკეთობების ავტორი, საკუთარი სახელოსნოს გახსნას, ზუგდიდში გამოფენის მოწყობასა და ზუგდიდელებისთვის თავისი დიორამების წარდგენას გეგმავს.