ფეისბუქ ჯგუფში "დაიტოვე" მოქალაქეები საპარლამენტო არჩევნებზე რეგიონებში რეგისტრირებულ ამომრჩევლებს ტრანსპორტირებაში ეხმარებიან.

მათი ნაწილი წერს, რომ საქალაქთაშორისო ტრანსპორტზე ადგილები არასაკმარისია და რეგიონებში გასამგზავრებლად სოციალურ ქსელში დაორგანიზება მოუხდათ.

ჯგუფში ამომრჩევლები ერთმანეთს უსასყიდლოდ ტრანსპორტირებას, საწვავის თანხის დაფინანსებას და საკუთარ საცხოვრებელ სახლებში დარჩენას სთავაზობენ.

"მეგობრებო, ვინმე თუ ხართ ისეთი, ვინც სამეგრელოში (სენაკი, ჩხოროწყუ, წალენჯიხა) ხართ ჩაწერილი, მაგრამ ვერ მიდიხართ იმის გამო, რომ იმავე დღეს უკან ვერ ბრუნდებით და დასარჩენი არ გაქვთ, ჩემი სახლის კარი ღიაა და რამდენიც მოხვალთ, ყველას დაგიტევთ.

სახლი ჩხოროწყუში მდებარეობს, ხვალ მივდივარ მეც. თუ ზემოაღნიშნულ ქალაქებში იქნებით, ჩემს სახლამდე ტრანსპორტირებაშიც დაგეხმარებით.
ამ ყველაფერს მხოლოდ ერთი წინაპირობა აქვს- არ უნდა იყო ქოცი!", - წერს მოქალაქე ბაჩანა საჯაია.

ცნობისთვის, ფეისბუქ ჯგუფი "დაიტოვე" ე.წ აგენტების კანონთან დაკავშირებით საპროტესტო აქციებისას შეიქმნა. სოციალურ ქსელში ახალგაზრდები რეგიონებიდან თბილისის აქციებში მონაწილეობის მსურველებს დედაქალაქში საკუთარ სახლებში დარჩენას სთავაზობდნენ.