აფხაზეთის თვითგამოცხადებული რესპუბლიკის ე.წ. პრეზიდენტმა განაცხადა, რომ მზადაა გადადგეს, მას შემდეგ, რაც აქციის მონაწილეები მისი ადმინისტრაციის შენობას დატოვებენ.
ამის შესახებ ასლან ბჟანიამ მის მშობლიურ სოფელ ტამიშში შეკრებილ მხარდამჭერებს განუცხადა.

„ამბობენ, რომ წავედი აფხაზეთიდან, აფხაზეთში ვარ. ჩვენ შევიკრიბეთ არა ჩემი ძალაუფლების შესანარჩუნებლად, არამედ სახელმწიფოებრიობის შესანარჩუნებლად. ვინც პრეზიდენტის ადმინისტრაციაშია, იქიდან უნდა წავიდეს, რის შემდეგაც გამოვაცხადებ არჩევნებს და დავტოვებ თანამდებობას“, - განაცხადა მან.

მანამდე, ბჟანია აცხადებდა, რომ გადადგომას არ აპირებს.  

ოპოზიციური ძალების საკოორდინაციო საბჭო მოქალაქეებს  "პრეზიდენტის"   ადმინისტრაციასთან შეკრებისკენ მოუწოდებს.  

"ასლან ბჟანია უნდა გადაგეს, რათა ქვეყანაში სიტუაცია დასტაბილურდეს", - წერენ ისინი ტელეგრამის არხებზე. 

ცნობისთვის, 15 ნოემბერს, ბჟანიას პრესსამსსახურმა გაავრცელა განცხადება, რომ ე.წ. ადმინისტრაცია ამზადებს დოკუმენტს მოსკოვსა და სოხუმს შორის საინვესტიციო ხელშეკრულების კანონპროექტის „პარლამენტიდან“ გაწვევის შესახებ.

15 ნოემბერს, აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. 11 საათზე ჩანიშნული სესია იმ მიზეზით არ შედგა, რომ საკითხის დღის წესრიგში შეტანას დეპუტატების არასაკმარისმა რაოდენობამ დაუჭირა მხარი.

თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.