„ბათუმელებისა“ და „ნეტგაზეთის“ თანადამფუძნებელმა და დირექტორმა მზია ამაღლობელმა შიმშილობის 38-ე დღეს გადაწყვიტა, შიმშილობა შეწყვიტოს. ამის შესახებ „ბათუმელების“ რედაქტორმა, ეთერ თურაძემ კლინიკა „ვივამედთან“ გამართულ ბრიფინგზე განაცხადა და ამაღლობელის მიერ ციხიდან გამოგზავნილი წერილი გააცნო საზოგადოებას.

“ბათუში, “ოცნების ქალაქი” მომხდარი ტრაგედიის, ორი არასრულწლოვანის ბავშვის თხრილში ჩავარდნის და დაღუპვის ფონზე, ჩემს ჯანმრთელობასა და სიცოცხლეზე საზოგადოების წუხილის მოსმენა წარმოუდგენლად მძიმეა ჩემთვის. ამ დღეებში, ექიმების დახმარებით, შევეცდები, როგორმე შევძლო კვების აღდგენა. სინდისის პატიმრებს – თემურ ქათამაძეს და ნიკოლოზ ჯავახიშვილს მადლობა სოლიდარობისთვის. ვთხოვ, მათაც შეწყვიტონ შიმშილობა.

განსაკუთრებულ პასუხისმგებლობას ვგრძნობ ჩემი თანამოაზრეების, კოლეგების, მეგობრების და ოჯახის მიმართ. არ მინდა, ჩემმა შიმშილობამ დაგასუსტოთ. თქვენ ჩემ ნაცვლადაც უნდა იბრძოლოთ”, - აღნიშნულია ამაღლობელის წერილში.

ცნობისთვის, მზია ამაღლობელი 11 იანვარს ბათუმში აქციაზე სისხლის სამართლის კოდექსის 353-ე პრიმა მუხლით დააკავეს, რაც პოლიციელზე თავდასხმას გულისხმობს. ის პოლიციის მთავარ სამმართველოსთან აქციის დროს თავდაპირველად ადმინისტრაციული წესით, პლაკატის გაკვრისთვის დააკავეს, ორ საათში კი გაათავისუფლეს. გათავისუფლებიდან რამდენიმე წუთში ის სისხლის სამართლის კოდექსით ისევ დააკავეს. მას, პოლიციელისათვის სილის გაწვნის გამო, 4-დან 7 წლამდე პატიმრობა ემუქრება. ჟურნალისტი, პროტესტის ნიშნად, უკვე 38 დღე შიმშილობდა.