ტელეგრამის არხების თანახმად, ოკუპირებულ აფხაზეთს ელექტრომომარაგება აღუდგა, ამავე ცნობით, ფსოუზე მომხდარი ავარიული გათიშვის გამოს, ელექტროენერგია არ მიეწოდებოდა, „დასავლეთის რაიონებს და სოხუმს“.

მანამდე, კომპანია „ჩერნომორენერგოს“ პრესსამსახური იტყობინებოდა, რომ ფსოუს ელექტროგადამცემი ხაზი ავარიულად გაითიშა. მიზეზები არ დასახელებულა. 

უფრო ადრე, აფხაზური მედია წერდა, რომ რუსეთმა, შესაძლოა, ელექტროენერგიის გაზრდილი მოცულობა მიაწოდოს ოკუპირებულ აფხაზეთს. ამის შესახებ დე ფაქტო რესპუბლიკის ენერგეტიკისა და ტრანსპორტის ე.წ. სამინისტროს ხელმძღვანელმა ჯანსუხ ნანბამ განაცხადა.

„დაბალი ტემპერატურა ხელს არ უწყობს წყლის ნაკადის ზრდას. შესაბამისად, ჯვრის წყალსაცავში წყლის დონე მინიმალურია და ეს ჩვენთვის სერიოზული პრობლემაა. ამასთან დაკავშირებით, არსებობს საფრთხე, რომ ისევ მოგვიწიოს „მარაოსებრი“ გრაფიკის ამოქმედება. რუსეთის ფედერაციის ხელმძღვანელობასთან თქვენი მოლაპარაკებების წყალობით, გუშინ უკვე მივიღეთ ინფორმაცია ჩვენი რუსი კოლეგებისგან, რომ სიტუაცია კიდევ ერთხელ გადაიხედება და დამატებითი დახმარების და ნაკადების მოცულობის გაზრდის კუთხით“, - თქვა მან „მინისტრთა კაბინეტში“ გამართულ შეხვედრაზე, რომელსაც არჩეული „პრეზიდენტი“ ბადრა გუნბა ხელმძღვანელობდა.

5 მარტს, ბადრა გუნბა რუსეთის პრეზიდენტმა კრემლში მიიღო. ვლადიმირ პუტინი მას დაჰპირდა, რომ მოსკოვიდან ელექტროენერგიის „ჰუმანიტარული ნაკადის“ მიწოდება გაგრძელდება.

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.