ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილის, გიორგი ცაგარეიშვილის ინფორმაციით, დევნილთათვის განკუთვნილი ბინების მშენებლობა სხვადასხვა ქალაქში, მათ შორის ზუგდიდში, აქტიურად მიმდინარეობს. ამის შესახებ მან პარლამენტში, ჯანმრთელობის დაცვისა და სოციალურ საკითხთა კომიტეტის სხდომაზე განაცხადა.

ცაგარეიშვილის თქმით, ხუთ ქალაქში, სამუშაოები, ეტაპობრივად, 2025 -2027 წლებში დასრულდება და 6 000-მდე ოჯახი განსახლდება.

ამასთან, მან „სოფლად სახლისა“ და „უსახლკარო და მძიმე საცხოვრებელ პირობებში მყოფი მრავალშვილიანი ოჯახების განსახლების“ პროგრამებზეც ისაუბრა. მისი თქმით, პროგრამების მიზანი, ოჯახებისთვის, ღირსეული საცხოვრებელი პირობების უზრუნველყოფაა.

ცნობისთვის, ზუგდიდში, ჯანაშიას ქუჩის მიმდებარე ტერიტორიაზე, 1700 დევნილი ოჯახისთვის თანამედროვე სტანდარტების შესაბამისი 7 კორპუსის მშენებლობა გასული წლის ოქტომბერში დაიწყო. სამინისტროში განმარტავენ, პროექტს კომპანია "ანაგი" ახორციელებს, მშენებლობის ბიუჯეტი კი 191 012 850 ლარია.

სოციალური მომსახურების სააგენტოს სტატისტიკით, 2025 წლის თებერვლის მდგომარეობით, სამეგრელო ზემო-სვანეთში 60 038 ადამიანს დევნილის სტატუსი აქვს. მათგან 33 935 პირი კი ზუგდიდის მუნიციპალიტეტში ცხოვრობს. ქვეყნის მასშტაბით, 193 404 დევნილია რეგისტრირებული.