ეროვნულმა ბანკმა გასული წლის 26 მარტს „ევრო 2024“-ზე საქართველოს ნაკრების ისტორიული წარმატების აღსანიშნავად საკოლექციო მონეტების რეალიზაცია დაიწყო.

სებ-ში ამბობენ, რომ თარიღი სიმბოლურად შეირჩა და ის უეფას-ს 2024 წლის ევროპის ჩემპიონატზე ეროვნული ნაკრების გასვლის დღეს ემთხვევა.

მათივე ცნობით, სებ-მა გამოუშვა საკოლექციო დანიშნულების 5 ლარის ნომინალის ოქროსა და ვერცხლის მონეტები (ოქრო – 1 500-იანი, ხოლო ვერცხლი – 10 000-იანი ტირაჟით).

ვერცხლის მონეტის სარეალიზაციო ფასი 130 ლარი, ოქროს მონეტის კი – 2 200 ლარია.

მათი გაყიდვა კი შემდეგი პირობებით მოხდება:

ვერცხლის მონეტის შეძენა შესაძლებელია 2025 წლის 26 მარტის 10:00 საათიდან:

ელექტრონული პლატფორმა – tkt.ge-ს მეშვეობით, მხოლოდ ორი დღის განმავლობაში (26 და 27 მარტს);

საკასო ცენტრისა და ყვარლის ფულის მუზეუმის სალაროებში.

ოქროს მონეტის შეძენა შესაძლებელი იქნება 2025 წლის 28 მარტის 10:00 საათიდან:

ელექტრონული პლატფორმის – tkt.ge-ს მეშვეობით მხოლოდ ერთი დღით, იმავე დღის ბოლომდე;

საკასო ცენტრისა და ყვარლის ფულის მუზეუმის სალაროებში.

ცნობისთვის, 2024 წლის 26 მარტს დინამო არენაზე საქართველოს გუნდმა ევრო 2024-ის პლეი ოფის ფინალში, პენალტების სერიაში, საბერძნეთი ანგარიშით - 4:2 დაამარცხა და ისტორიაში პირველად, ევროპის ჩემპიონატის ფინალურ ეტაპზე გავიდა.