საქართველოს მოქალაქემ ირაკლი ბებუამ ოკუპირებული აფხაზეთის საპატიმრო დღეს, 2025 წლის 30 მარტს დატოვა და უკვე საქართველოს კონტროლირებად ტერიტორიაზე იმყოფება.

ირაკლი ბებუას ფოტოებს სახელმწიფო უსაფრთხოების სამსახური ავრცელებს. მან საოკუპაციო ხაზი საბერიო- ფახულანის გადასასვლელის გავლით გადაკვეთა.

ბებუას ოკუპირებული აფხაზეთის ე.წ. სასამართლომ "სახელმწიფო სიმბოლიკის შეურაცხყოფის", "სხვისი ქონების განზრახ დაზიანების" და "საბრძოლო მასალის უკანონოდ შენახვის" ბრალდებით 2020 წლის 7 დეკემბერს 9 წლით თავისუფლების აღკვეთა მიუსაჯა. ის 2020 წლის 1-ელ ოქტომბერს დააკავეს.

ამასთან, აფხაზეთის დე ფაქტო რესპუბლიკის  ე.წ. შინაგან საქმეთა მინისტრმა, რობერ კიუტმა უარყო ინფორმაცია, რომ ბებუა იზოლატორს დადგენილ ვადაზე ადრე დატოვებს. 

„მან სახელმწიფო დროშა დაწვა, რისთვისაც მიესაჯა 9 წლით თავისუფლების აღკვეთა. საერთო ჯამში, მას უნდა დაეყო 4 წელი და 6 თვე. 30 მარტს მთავრდება მისი საგამოძიებო იზოლატორში ყოფნის ვადა. შესაბამისად, ჩვენ ვალდებული ვიქნებით, გავათავისუფლოთ იგი. არავინ გეგმავს ამ პიროვნების ვადაზე ადრე გაშვებას. ეს ხდება იმ მუხლისა და იმ ვადების შესაბამისად, რომლებიც მას სასამართლომ მიუსაჯა", - განაცხადა კიუტმა. 

მანამდე, მედიაში განმარტავდნენ, რომ ოკუპირებულ აფხაზეთში საპატიმრო კოლონიები არ არის, არის მხოლოდ დაკავების იზოლატორი, რის გამოც პატიმრობის ვადა, "კანონით", საერთო რეჟიმის პირობებში უტოლდება "ერთი ორს".

ცნობისთვის, 2024 წლის აგვისტოში, ოკუპირებული აფხაზეთის დე ფაქტო სუს - მა გალის რაიონის სოფელ მეორე ოტობაიაში ე.წ. საზღვრის "უკანონო კვეთის ხელშეწყობისთვის" საქართველოს სამი მოქალაქე დააკავა. გარდა ამისა, უკანონო პატიმრობაშია საქართველოს კიდევ ერთი მოქალაქე ქრისტინე თაკალანძე, მას ბრალად ედება "ჯაშუშობა" და ე.წ. უზენაესმა სასამართლომ 10 წლითა და 6 თვით თავისუფლების აღკვეთა 2023 წლის 5 მაისს მიუსაჯა.