„ქართული ოცნების“ მიერ მე-6 პრეზიდენტად დანიშნულმა მიხეილ ყაველაშვილმა ხელი მოაწერა მედიის შემზღუდავ კანონებსა და FARA-ს ქართულ თარგმანს, ასევე, სისხლის სამართლის კოდექსში სამშობლოს ღალატის მუხლის ჩამატებას. კანონები საკანონმდებლო მაცნეზე უკვე გამოქვეყნდა.

კანონი, რომელიც მაუწყებლებს უცხოეთიდან დაფინანსების მიღებას უკრძალავს, გამოქვეყნებისთანავე ამოქმედდა, FARA კი გამოქვეყნებიდან მე-60 დღეს ამოქმედდება. ძალაში შევიდა სისხლის სამართლის კოდექსში სამშობლოს ღალატის მუხლის დამატებაზე ცვლილებაც.

ცნობისთვის, კანონის მიხედვით, იკრძალება მაუწყებლის მიერ უცხოური ძალისგან პირდაპირი ან არაპირდაპირი დაფინანსების - ფულადი თანხის ან ქონებრივი ღირებულების სხვა სახის მატერიალური სიკეთის მიღება (გარდა კომერციული რეკლამისა, ტელეშოპინგისა, სპონსორობისა და პროგრამაში პროდუქტის განთავსებისა), ასევე, უცხოური ძალის მიერ მაუწყებლის მომსახურების შესყიდვა (გარდა კომერციული რეკლამისა და პროდუქტის განთავსებისა) და პროგრამის მომზადების ან ეთერში გადაცემის პირდაპირი ან ირიბი დაფინანსება ან თანადაფინანსება.

„უცხოურ ძალად“ მიიჩნევა: - უცხო სახელმწიფოს ხელისუფლების სისტემის შემადგენელი სუბიექტი; ფიზიკური პირი, რომელიც საქართველოს მოქალაქე არ არის; იურიდიული პირი, რომელიც საქართველოს კანონმდებლობის საფუძველზე არ არის დაფუძნებული; ისეთი ორგანიზაციული წარმონაქმნი - მათ შორის, ფონდი, ასოციაცია, კორპორაცია, კავშირი, სხვა სახის ორგანიზაცია ან პირთა სხვა სახის ისეთი გაერთიანება, რომელიც უცხო სახელმწიფოს სამართლის ან საერთაშორისო სამართლის საფუძველზეა დაფუძნებული.

რაც შეეხება FARA-ს. აღნიშნული კანონით სუბიექტის უცხოეთის აგენტად რეგისტრაციის საკითხები წესრიგდება. მისი აღსრულება კი, ანტიკორუფციულ ბიუროს დაევალება. ამერიკული ანალოგისაგან განსხვავებით, ის ეხება დამოუკიდებელ სამოქალაქო ორგანიზაციებსა და მედიასაც.

FARA-ს მიზანია გააკონტროლოს უცხოური ძალის პირდაპირი გავლენა ადგილობრივ პოლიტიკაზე, როდესაც უცხოეთიდან დაფინანსებული პირები ავტონომიურად არ მოქმედებენ და სრულად ექვემდებარებიან პრინციპალის მითითებებს.

კანონპროექტები საქართველოს პარლამენტმა მესამე, საბოლოო მოსმენით, 1-ელ აპრილს დაამტკიცა. მას მხარი „ქართული ოცნების“ 86-მა დეპუტატმა დაუჭირა.