საზოგადოების მაღალი ინტერესის გათვალისწინებით, სურსათის ეროვნული სააგენტოს უფროსმა ზურაბ ჩეკურაშვილმა რძის ნაწარმში აფლატოქსინის გამოვლენის საკითხზე ისაუბრა. ამის შესახებ ინფორმაციას სეს-ი ავრცელებს.

ჩეკურაშვილი ამბობს, რომ რძის სექტორი გამოირჩევა მაღალი სტანდარტებით, რაც, მისი თქმით, სახელმწიფოსა და კერძო სექტორს შორის წარმატებული თანამშრომლობის მაგალითია.

„კომპანია „სოფლის ნობათის” რძის კონკრეტულ პარტიებში დაფიქსირებულ აფლატოქსინთან დაკავშირებით, სურსათის ეროვნულმა სააგენტომ იმოქმედა საერთაშორისო სტანდარტის და პრაქტიკის შესაბამისად.

დარღვევის გამოვლენისთანავე, საზოგადოებას მივაწოდეთ სრული ინფორმაცია. სააგენტოსთან აქტიურად ითანამშრომლა კომპანიამ. დღეს შეგვიძლია დარწმუნებით ვთქვათ, რომ ყველა ის პარტია, სადაც დარღვევა იყო, სააგენტოს ზედამხედველობით, სრულად არის ამოღებული ქსელიდან.

სააგენტოს მისამართით დაისვა კითხვა დახლებზე განთავსებულ პროდუქციასთან დაკავშირებით. აქაც კიდევ ერთხელ განვმარტავ - არ არსებობს არანაირი შეშფოთების საფუძველი.

სამომხმარებლო ქსელში არსებული პროდუქცია მაქსიმალურად კონტროლდება, ისევე როგორც აქტიურად მოწმდება თვითონ საწარმოები“, - აღნიშნა მან.

სურსათის ეროვნული სააგენტომ 3 აპრილს განაცხადა, რომ კომპანია „სოფლის ნობათის“ რძის ნიმუშებში აფლატოქსინი გამოვლინდა. უწყების ცნობით, სარეალიზაციო ქსელიდან სრულად არის ამოღებული კონკრეტული პარტია, სადაც დარღვევა აღმოჩნდა. სააგენტოში განმარტეს, რომ აფლატოქსინი წარმოიქმნება ობის სოკოებისაგან. აფლატოქსინ B1-ით დაბინძურებული საკვები ხვდება ცხოველის ორგანიზმში, საიდანაც გადადის რძეში და გარდაიქმნება M1 აფლატოქსინად, რაც საფრთხეს უქმნის ადამიანის ჯანმრთელობას.