ზუგდიდის რაიონულ სასამართლოში სამოქალაქო აქტივისტის კერენ ესებუას პროცესი გაიმართა. მოსამართლე გვანცა ვარდანიძემ ის სამართალდამრღვევად ცნო ადმინისტრაციულ სამართალდარღვევათა კოდექსის 173-ე-მე-16 პრიმა მუხლის პირველი ნაწილით, რაც თანამდებობის პირის შეურაცხყოფას გულისხმობს და ადმინისტრაციულ პასუხისმგებლობად 3500 ლარი დააკისრა.

როგორც ცნობილია, 21 მაისს, "ქართული ოცნების" დეპუტატმა ირაკლი ზარქუამ კერენ ესებუას და კიდევ ერთ სამოქალაქო აქტივისტს მარიამ სიჭინავას უჩივლა, რადგან ისინი წინა დღეს, ზუგდიდში, ერთ-ერთ სასტუმროსთან  საპროტესტო შეძახილებით დახვდნენ.

სიჭინავას სასამართლო პროცესი კი ამ წუთებში მიმდინარეობს. 

ცნობისთვის, სახელმწიფო-პოლიტიკური თანამდებობის პირის, პოლიტიკური თანამდებობის პირის, ასევე სახელმწიფო მოსამსახურისა და საჯარო მოსამსახურის სიტყვიერი შეურაცხყოფა ან სხვაგვარი შეურაცხმყოფელი ქმედება დასჯადია და იწვევს სამართალდამრღვევის დაჯარიმებას 1500 ლარიდან 4 000 ლარამდე ოდენობით ან ადმინისტრაციულ პატიმრობას 45 დღემდე ვადით.