ზუგდიდში, ცენტრალური ბულვარის ტერიტორიაზე, ზვიად გამსახურდიას ბიუსტის მიმდებარედ მოქალაქეებმა მეგრული ენის დღე აქციით აღნიშნეს. ადგილზე გაშლილია ბანერი წარწერით: „მიგახვამანთ მარგალურ ნინაშ დღას, ფალუა მარგალურ ნინას“
აქციის ერთ-ერთი ორგანიზატორი და ააიპ „სამეგრელოს ხმის“ დამფუძნებელი თენგიზ ჯგუშია ამბობს, რომ შეკრების მიზანი პოლიტიკურია, რაც, მისი თქმით, გულისხმობს მეგრული, სვანური და ლაზური ენებისთვის მინიმუმ რეგიონული ენების სტატუსის მინიჭების მოთხოვნას.

„29 მაისმა უკვე, დაახლოებით, 10 წელიწადია მიიღო სამეგრელოს მოსახლეობისგან, საქართველოს ძირძველი და გამაერთიანებელი მისიის მატარებელი მოსახლეობისგან სრულფასოვანი ლეგიტიმაცია, რომ ეს დღე მეგრული ენის დღესასწაულად აღინიშნებოდეს. დღეს გახლავთ ცნობილი ენათმეცნიერისა და მეგრული ენის მკვლევრის, მეგრული ენის პრობლემების შემსწავლელი მამანტი ძაძამიას დაბადების დღე, ამიტომაც, ეს დღე სიმბოლურად დაწესდა მეგრული ენის დღედ. მეგრულ ენას აქვს სერიოზული პრობლემები, აქვს პოლიტიკური და სახელმწიფოებრივი პრობლემები. მეგრული ენა, როგორც სრულფასოვანი ენა, ლაზურთან და სვანურთან ერთად ფაქტობრივად ასიმილირებულია. ქართულ ენას კი, რომლის მასაზრდოებელია მეგრული, სვანური და ლაზური ენები, მათ გარეშე არსებობა, ფაქტობრივად, არ შეუძლია. ქართულ ენას მალე პრობლემები შეექმნება, თუ სახელმწიფომ მეგრულ-სვანურ-ლაზურ ენებს შესაბამისი სტატუსი არ მიანიჭა, რასაც ითხოვს, ევროკავშირი და ევროსაბჭო, რაც არის ის, რომ მათ მინიმუმ რეგიონული ენის სტატუსი მიენიჭოს. ჩვენი მიზანი არის სწორედ ეს“, - აღნიშნავს ჯგუშია.

აქციის მონაწილე მალხაზ გრიგოლია განმარტავს, რომ დღევანდელი დღე მნიშვნელოვანია მეგრული ტრადიციებისა და წინაპრების მიერ დატოვებული მემკვიდრეობის შესანარჩუნებლად.

„წინაპრების ენა არ უნდა დავივიწყოთ, წინააღმდეგ შემთხვევაში, ჩვენი მომავალი ბუნდოვანი იქნება და იქნება სხვა კულტურას მიტმასნებული. ჩვენ თანამედროვე მსოფლიოს არ უნდა ჩამოვრჩეთ და სხვა კულტურებიც შევითვისოთ, თუმცა არ უნდა დაგვავიწყდეს მშობლიური ენა, რაც ჩვენი წინსვლის აუცილებელი გარანტიაა“.

მეგრული ენის დღე ზუგდიდში ყოველწლიურად, 29 მაისს, 2013 წლიდან აღინიშნება.