განმეორებითი კენჭისყრის პროცედურებს ზუგდიდის სამ საარჩევნო უბანზე არასამთავრობო ორგანიზაციები „საუნჯე”, „სამოქალაქო საზოგადოების განვითარების ცენტრი (CSDC)”, „ნაბიჯი სამოქალაქო ინტეგრაციისკენ” და „ჰელფინგ ჰენდი” აკვირდებიან. მათ ამ დროისთვის არსებული მდგომარეობის შესახებ განცხადება გამოაქვეყნეს.

,,არჩევნების დღის პირველი ნახევარი აღნიშნულ უბნებზე უმეტესწილად მშვიდ გარემოში მიმდინარეობს, თუმცა დაფიქსირდა ხმის მიცემის ფარულობის დარღვევა, რაზედაც ვითხოვთ დაუყოვნებელ და მკაცრ რეაგირებას.

2016 წლის 22 ოქტომრბის განმეორებითი კენჭისყრა 15 საათის მდგომარეობით ზუგდიდის სამ საარჩევნო უბანზე (სოფ. ჯიხაშკარის 66.67.38, 66.67.79 და სოფელ განმუხურის 66.67.108 უბნებზე) უმეტესწილად მშვიდად მიმდინარეობს. თუმცა საკმაოდ მძიმე დარღვევა დაფიქსირდა სოფ. ჯიხაშკარის 79-ე უბანზე, ერთ-ერთმა დამკვირვებელმა, ორგანიზაციის წარმომადგენელმა რამდენჯერმე შეიხედა ხმის მიცემის კაბინაში, იმ დროს, როდესაც შიგნით ამომრჩეველი იმყოფებოდა. ამის შემდეგ კი სხვა პირს თვალი ჩაუკრა და თქვა “ის შემოხაზა, ვინც ვუთხარით”. აღნიშნული ქმედება, ერთის მხრივ, ხმის მიცემის ფარულობას არღვევს, რაც სისხლის სამართლის კოდექსის 164-ე მუხლით გათვალისწინებული დანაშაულია, ხოლო, მეორეს მხრივ, მიუთითებს, რომ შესაძლებელია ამომრჩევლის ნების გამოხატვაზე ზეგავლენასაც ჰქონდა ადგილი, რაც სისხლის სამართლის კოდექსის 162-ე მუხლით გათვალისწინებული დანაშაულია.

აღნიშნული ძალიან სერიოზული საარჩევნო გადაცდომაა და აუცილებელია დაუყოვნებელი და მკაცრი რეაგირება მოხდეს. ხაზი უნდა გავუსვათ იმ გარემოებას, რომ ზემოთ მითითებული დამკვირვებელმა ცესკოს წარმომადგენლის მიერ შენიშვნის გამოთქმის შემდეგ დატოვა საარჩევნო უბანი, თუმცა ეს არ ნიშნავს, რომ დარღვევა აღმოიფხვრა. აუცილებელია, სამართალდამცავი ორგანოების მხრიდან სათანადო რეაგირება (თუმცა, ჩვენი მოთხოვნის მიუხედავად ადგილზე მყოფმა პოლიციის წარმომადგენლებმა უარი განაცხადეს რეაგირებაზე). ხმის მიცემის ფარულობის თუნდაც ერთჯერადად დარღვევა საკმარისია ამ დანაშაულის ჩამდენის პასუხისგებაში მისაცემად. ჩვენ მივმართვავთ ზუგდიდის საოლქო პროკურატურას ფაქტის გამოძიების და შესაბამისი პირის/პირების პასუხისგებაში მიცემის მოთხოვნით.

საარჩევნო უბნებზე არ ფიქსირდება სხვა მნიშვნელოვანი ხარვეზები და უმეტესწილად მცირე ხარისხის ტექნიკურ გადაცდომებს აქვს ადგილი, რაც კვლავ მიუთითებს კომისიის წევრების კვალიფიკაციის პრობლემაზე. აუცილებელია, განმეორებითი კენჭისყრა მშვიდ ვითარებაში გაგრძელდეს, ყველა ჩართულმა მხარემ დაიცვას კანონით დაწესებული მოთხოვნები და თავი აარიდოს ამომრჩეველზე ზეგავლენის მოთხოვნას ან ხმის მიცემის ფარულობის დარღვევას",- ნათქვამია განცხადებაში.