„ერთად ჩვენ შევძლებთ“ - ამ სახელწოდების ახალგაზრდული ფორუმი ასოციცია „ათინათის“ ორგანიზებით დღეს, 7 დეკემბერს ზუგდიდის #4 საჯარო სკოლის სააქტო დარბაზში გაიმართა. ფორუმზე, ზუგდიდის მუნიციპალიტეტის სხვადასხვა საჯარო სკოლის მოსწავლეების მიერ, 5 პროექტი იყო წარმოადგენილი. მათ შორის, „გზა ჯანმრთელობისკენ“, „არჩევანი ჩვენზეა“ (თემა-ეკოლოგია), „დავიწყოთ ცხოვრება ჯანსაღი წესით“, „მოხალისეობის ინსტიტუტის განვითარება“ და „ვიცით უფლება- ვქნით მომავალს“ (ბავშვთა უფლებებზე). მუნიციპალიტეტის თვითმმართველობების, ბიზნესმენებისა და არასამთავრობო ორგანიზაციების წარმომადგენელბის მხრიდან, რომლებიც აღნიშნულ შეხვედრას ესწრებოდნენ, მოსწავლეების მიერ წარმოდგენილმა თითოეულმა პროექტმა დიდი მოწონება დაიმსახურა. თუმცა, განსაკუთრებული მოწონება ეკოლოგიისა და მოხალისეობის ინსტიტუტის განვითარების იდეამ დაიმსახურა. როგორც გამგებლის მოადგილის მოვალეობის შემსრულებელმა გურგენ სართანიამ, ისე არასამთავრობო ორგანიზაციისა და ბიზნეს სექტორის წარმომადგენლებმა, მოსწავლეებს პროექტების განხორციელებაში დახმარება და ხელშეწყობა აღუთქვეს. როგორც პროექტის კოორდინატორი სალომე გარდავა განმარტავს, ფორუმის მიზანია: მოსწავლეთა აქტიური მონაწილეობით თემის ადგილობრივი საჭიროებების კვლევა, პრობლემის გადაჭრის გზების მოძიება, რეკომენდაციების შემუშავება და პრობლემის მოგვარებაზე მუშაობა გადაწყვეტილების მიმღებ პირებთან თანამშრომლობით. „პროექტი უკვე მესამე წელია ხორციელდება და იმედი გვაქვს კიდევ გაგრძელდება, რათა კიდევ უფრო მეტი აქტიური მოქალაქე გაუზარდოთ ჩვნს ქალაქს“ - ამობობს სალომე გარდავა. ახალგაზრდული ფორუმი ორგანიზებულია სამოქალაქო განათლებისა და პედაგოგთა გადამზადების პროგრამის ფარგლებში, რომელსაც ახორციელებს ამერიკული ორგანიზაცია PH International, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. პროგრამას სამეგრელო-ზემო სვანეთის რეგიონში ასოციაცია „ათინათი“ ახორციელებს.