სურსათის ეროვნულმა სააგენტომ, ლაბორატორიული კვლევის შედეგად გაარკვია, რომ ჯანმრთელობისთვის მავნე 48 ტონა ირანული წარმოშობის პროდუქტის გაყიდვით ერთ-ერთი კომპანია იყო დაკავებული. მომხმარებელთა უფლებების დამცველთა და მარილის იმპორტიორთა ნაწილი აცხადებს, რომ საქართველოს ბაზრებსა და სუპერმარკეტებში დიდი ოდენობით ტყვიის, ვერცხლისწყლისა და დარიშხანის შემცველი მარილი დღესაც იყიდება და მონიტორინგის გაგრძელებაა აუცილებელი. ვაგზალის მოედანზე ერთ-ერთ მაღაზიაში კომპანია ”სოლტ ლაინ ჯორჯიას” წარმომადგენელმა ფირები ფარულად გადაიღო, სადაც ჩანს, როგორ აფასოებენ და გასაყიდად ამზადებენ საკვებ მარილს. კომპანიის წარმომადგენელი რატი კვანტრიშვილი აცხადებს, რომ ასეთი ფაქტების აღმოჩენის შემდეგ, პროდუქცია ექსპერტიზაზე უკრაინის ერთ-ერთ ლაბორატორიაში გაგზავნეს, სადაც დადგინდა, რომ მარილი დიდი ოდენობით ტყვიას, ვერცხლისწყალს და დარიშხანს შეიცავდა.