ბიზნესმენებისა და პრემიერის შეხვედრა ბიზნესსა და სახელმწიფოს უმაღლეს წარმომადგენლებს შორის დიალოგს ემსახურება, - ამის შესახებ ჟურნალისტებს ბიზნესომბუდსმენმა , გიორგი გახარიამ განუცხადა. მისივე თქმით, ამის გარეშე ქვეყნის ეკონომიკური ზრდა ძნელად წარმოსადგენია, შესაბამისად ამგვარი შეხვედრები რეგულარულ ხასიათს მიიღებს. როგორც გიორგი გახარიამ განმარტა, შეხვედრებზე პერიოდულად იქნება ბიზნესმენთა როტაცია, წარმოდგენილი იქნებიან სხვადასხვა სფეროს წარმომადგენელი ბიზნესმენები, ასევე სექტორების მიხედვით ცალ-ცალკე გაიმართება შეხვედრა მცირე და საშუალო ბიზნესთან. "ბიზნესომბუდსმენის აპარატის მთავარი მიზანია, ხელი შეუწყოს ამ დიალოგს, როგორც მედიატორმა. ველოდებით ბიზნესმენების კითხვებს და შესაბამისად, პრემიერის პასუხებს. მთავარი მესიჯი იქნება ის, რომ უკვე მოვიდა შემდგომი ნაბიჯების გადადგმის დრო. ჩვენ ვაფიქსირებთ - ბიზნესზე ზეწოლა არ არსებობს, გვაქვს თავისუფალი სასამართლო, ყველანაირად მხარს ვუჭერთ ბიზნესის განვითარებას და მოვიდა დრო, გადავდგათ კონკრეტული ეკონომიკური ნაბიჯები ბიზნესის წინსვლისთვის", - აღნიშნა გიორგი გახარიამ. პრემიერ-მინისტრის შეხვედრა ბიზნესმენებთან სასტუმრო "რედისონში" იმართება. შეხვედრაზე 80-მდე ბიზნესმენია მიწვეული, რომელთა შორის უცხოელებიც არიან.