საპატრულო პოლიციის თანამშრომლის გოგა ანჩაბაძის დაჭრაში ბრალდებულ კონსტანტინე გულორდავას ზუგდიდის რაიონულმა სასამართლომ 1 წლიანი პირობითი პატიმრობა შეუფარდა. ამასთან, გულორდავას ჯარიმის სახით 2000 ლარის გადახდა დაეკისრა. როგორც რადიო "ათინათს" გულორდავას ადვოკატმა ჯიტა გულუამ განუმარტა, ის პროკურატურასთან მიღწეული საპროცესო შეთანხმებით კმაყოფილია. "ეს შეთანხმება არამარტო კანონზე დამყარებულია, არამედ გათვალისწინებულია ის დიდი ინტერესი საზოგადოების ნაწილისა, რომელიც დაინტერესებული იყო ამ საქმის შედეგით და ასევე, საზოგადოებაში დამკვიდრებული ზეობრივი ნორმებით. შესაბამისად არაფერი მეთქმის პროკურატურის მიმართ", - ამბობს ჯიტა გულუა. ცნობისთვის, ზუგდიდში მოქალაქე კონსტანტინე გულორდავამ საპატრულო პოლიციის თანამშრომელს, გოგა ანჩაბაძეს ცემა, ყური მოაჭრა, საპატრულო პოლიციის ფორმა გახადა და ზუგდიდში ყოფილი პოლიტექნიკური კოლეჯის ეზოში დატოვა. გავრცელებული ინფორმაციით გულორდავამ ანჩაბაის მიერ მისი ცოლის გაუპატიურების მცდელობის გამო იძია შური. რაც შეეხება გოგა ანჩაბაძეს, მის წინააღმდეგ საქმე გაუპატიურების მუხლით არის აღძრული.