დღეს თითქმის მთელს საქართველოში ითოვებს. გარემოს დაცვის ეროვნული სააგენტოს ინფორმაციით, მაღალმთიან რაიონებში მოსალოდნელია ძლიერი ქარბუქიც. რაც შეეხება დედაქალაქს, თბილისშიც დროგამოშვებით ითოვებს და არამდგრადი ამინდი იქნება. სინოპტიკოსები პირველ და ორ თებერვალს თოვის ინტენსივობის კლებას ვარაუდობენ, თუმცა ზოგიერთ რაიონში მცირე თოვა და ნისლი მაინც შენარჩუნდება. ასევე მკვეთრად დაიკლებს ჰაერის ტემპერატურაც. უამინდობის გამო საავტომობილო გზებზე შეზღუდვები დაწესდა. თელავი-გომბორი- ვაზიანის უღელტეხილზე მოძრაობა ნებადარულია მხოლოდ მოცურების საწინააღმდეგო ჯაჭვების გამოყენებით და ასევე მაღალი გამავლობის ტრანსპორტისთვის. აღნიშნულ მონაკვეთზე ამ დრომდე ინტენსიურად თოვს. ზვავსაშიშროების გამო ყველა სახის ტანსპორტისთვის აიკრძალა გადაადგილება გუდაური-კობის მიმართულებით. მისაბმელიან, ნახევრადმისაბმელიან და 30 ადგილზე მეტი ტევადობის ავტოსატრანსპორტო საშუალებებისთვის კი შეზღუდვები დაწესდა მესტიის მიმართულებით. რაც შეეხება სხვა სახის ტრანსპორტს, აქ მათთვის მოძრაობა მხოლოდ მოცურების საწინააღმდეგო ჯაჭვებითაა დასაშვები. ავტომაგისტრალებზე გზის გაწმენდითი სამუშაოები უწყვეტ რეჟიმში მიმდინარეობს.