"საქართველოს სისხლის სამართლის კოდექსში" ცვლილებები შედის, რომლის თანახმად, უკანონო მიყურადებისთვის სასჯელი 3-დან 7 წლამდე მკაცრდება. აღნიშნულის შესახებ მთავრობის სხდომის დასრულების შემდეგ შს მინისტრმა ალექსანდრე ჭიკაიძემ განაცხადა. მისივე განმარტებით, აღნიშნული გადაწყვეტილება მინისტრთა კაბინეტის შემადგენლობამ მთავრობის დღევანდელ სხდომაზე მიიღო. "როგორც მოგეხსენებათ, უკანასკნელი წლების განმავლობაში ხდებოდა ადამიანის პირადი ცხოვრების უკანონოდ მიყურადება, ჩაწერა და ამით უხეშად ირღვეოდა ადამიანის უფლებები. ამისთვის კანონი ითვალისწინება სამ წლამდე პასუხისმგებლობას და ახლა გაითვალისწინებს შვიდ წლამდე პასუხისმგებლობას", - განაცხადა ჭიკაიძემ. ჭიკაიძის განცხადებით, პირი, რომელიც პირადი ცხოვრების ამსახველ მასალებს სამართალდამცველ სტრუქტურებს გადასცემს, პასუხისმგებლობისგან გათავისუფლდება.