ამის შესახებ საქართველოს პრეზიდენტმა გიორგი მარგველაშვილმა პარლამენტში სიტყვით გამოსვლის დროს განაცხადა. თვითმმართველობის არჩევნების 15 ივნისს გამართვის განკარგულებას პრეზიდენტი ხელს მას შემდეგ მოაწერს, რაც პარლამენტი საარჩევნო კანონმდებლობაში დაგეგმილ ცვლილებებს დაამტკიცებს. სიტყვით გამოსვლისას მარგველაშვილმა თვითმმართველობის რეფორმის მნიშვნელობაზე გაამახვილა ყურადღება. "მივესალმები იმას, რომ პარლამენტმა თვითმმართველობის კოდექსი მიიღო, თუმცა იცით, რომ რეფორმა კოდექსის მიღებით მხოლოდ იწყება. 2014 წელს ჩვენ წინაშე დგას უმნიშველოვანესი ამოცანა, რომ არათუ ჩავატაროთ თვითმმართველობის არჩევნები, არამედ რეალურად ავამუშაოთ თვითმმართველობის სისტემა. მივესალმები იმას, რომ მერები და გამგებლები პირდაპირი წესით იქნებიან არჩეული", - განაცხადა პრეზიდენტმა. მისივე თქმით 2014 წლის არჩევნები უნდა იყოს თვისობრივად უკეთესი და არა იმაზე ნაკლები, რაც 2013 წლის საპრეზიდენტო არჩევნები იყო." "ეს უმნიშვნელოვანესი პოლიტიკური ამოცანაა, რითაც დავასრულებთ 2012 წელს დაწყებულ დემოკრატიის კონსოლიდაციის პროცესს. გამომდინარე იქიდან, რომ პოლიტიკურმა ძალებმა, სადამკვირვებლო მისიებმა, საზოგადოებამ უცბად არ გაიგოს არჩევნების შესახებ და დაიწყოს არჩევნებისთვის დროული მზადება, მინდა მოგახსენოთ - არჩევნები დაინიშნება მიმდინარე წლის 15 ივნისს. შესაბამისს განკარგულებას მოვაწერ ხელს მას შემდეგ, რაც პარლამეტი საარჩევნო კოდექსს მიიღებს" , - განაცხადა მარგველაშვილმა.