გორისა და ატენის მიტროპოლიტის მეუფე ანდრიას განცხადებით ბერი გაბრიელი საფლავი უკვე გახსნილია. "საფლავი უკვე გახსნილია, მისი წმინდა ნეშტიც უკვე გამოჩნდა, ძალზე მალე იქნება გადასვენებული სპეციალურად მომზადებულ ლუსკუმაში და ამის შემდგომ დაბრძანდება ჯერ საფლავთან, ხოლო მისი უწმინდესობის მობრძანების შემდგომ გადასსვენებული იქნება სამთავროს დედათან მონასტრის ფერისცვალების ტაძარში, სადაც შესრულდება საზეიმო პარაკლისი. ამის შემდგომ კი გადასვენდება სვეტიცხოვლის ტაძარში"- განაცხადა ტელეკომპანია "იმედთან" საუბრისას მეუფე ანდრიამ. შეგახსენებთ, რომ მამა გაბრიელის საფლავის გახსნის გამო, სამთავროს დედათა მმონასტრის ტერიტორიაზე ათასობით ადამიანია შეკრებილი, თუმცა ტაძარში მხოლოდ იმ მოქალაქეებს უშვებენ ვისაც სპეციალური საშვები აქვთ.  გავრცელებული ინფორმაციით, საშვები საპატრიარქომ გასცა, თუმცა რა პრინციპით გასცა აღნიშნული საშვები უცნობია. შეგახსენებთ, რომ ნეშტს 24 თებერვალს სამების საკათედრო ტაძარში დაასვენებენ და ერთი კვირის მანძილზე მრევლს ექნება საშუალება პატივი მიაგოს მას, აცხადებს საქართველოს მართლმადიდებელი ეკლესია. საპატრიარქოს განცხადებით, ბერის ნაწილებს 22 თებერვალს, 12:00 საათზე საფლავიდან ამოასვენებენ. ნეშტს ჯერ დაასვენებენ სამთავროს ფერისცვალების ტაძარში, ხოლო 18:00 საათზე გადასვენდება სვეტიცხოველში. საზეიმო ლოცვა სვეტიცხოვლში, რომელსაც პატრიარქი ილია მეორე ჩაატარებს, შაბათს, 19:00 საათზე დაიწყება. ხოლო საზეიმო წირვა კვირას, 10:00 საათზეა დაგეგმილი. წირვა-ლოცვას ილია მეორესთან ერთად მართლმადიდებელი ეკლესიის სინოდის წევრებიც დაესწრებიან. საპატრიარქოს განცხადებით, გაბრიელ ბერი სამთავროს ფერისცვალების ტაძარში დაიკრძალება.