6 წლის ასაკს მიუღწეველი ბავშვები საჯარო სკოლაში სწავლის დაწყებას ვერ შეძლებენ. პარლამენტის განათლების კომიტეტზე დღეს იმ კანონპროექტზე იმსჯელეს, რომელიც აღნიშნულ შეზღუდვას ითვალისწინებს. კომიტეტის თავმჯდომარის მოადგილის ელისო ჩაფიძის განცხადებით, კანონში ცვლილებები სახელმწიფოს მხრიდან გააზრებულ ნაბიჯს წარმოადგენს, რადგან როგორც ჩაფიძე აღნიშნავს, ყოველთვის იქნება სკოლაში 6 წელს მიუღწეველი ბავშვის შეყვანის ცდუნება. კანონპროექტის პირველი მოსმენით განხილვას განათლების მინისტრის მოადგილე ქეთევან ნატრიაშვილი ესწრებოდა. ნატრიაშვილის განცხადებით, რეგულაცია პირველკლასელთა რიცხვის რაოდენობაზე არ აისახება. „თუ ბავშვი სწავლის დაწყებამდე არ არის 6 წლის და რამდენიმე თვეში ხდება, მაშინ ის სწავლას მომდევნო წელს დაიწყებს. გასულ წელს 45 000 პირველკლასელი გვყავდა. მიმდინარე წელს 5 000-ით მეტს ველოდებით“, - ამბობს მინისტრის მოადგილე.