საქართველოს მოსახლეობის რაოდენობა უმნიშვნელოდ გაიზარდა. საქართველოს მოსახლეობა 2014 წლის პირველი იანვრის მონაცემებით 4,49 მილიონს შეადგენს , შარშან ამავე პერიოდში კი, მოსახლეობის რაოდენობა 4,483 მილიონი იყო. მოსახლეობის 53,7% ქალაქში ცხოვრობს, 46,3% - სოფელში; 47,7% მამაკაცია, 52,3% კი - ქალი. "საქსტატის" ინფორმაციით, 2013 წელს, წინა წელთან შედარებით, 5-9 წლის ასაკობრივი ჯგუფის მოსახლეობაში 0,2%-ით მატება აღინიშნება, რაც გამოწვეულია 2006 წლიდან ცოცხლად დაბადებულთა რიცხოვნობის ზრდით. 2012 წელთან შედარებით, 10-24 წლის ასაკობრივ ჯგუფში აღინიშნება 0.7%-იანი კლება, მათგან 20-24 წლის ასაკობრივმა ჯგუფმა ყველაზე დიდი კლება (0,3 პროცენტი) განიცადა, რაზეც ზეგავლენა მოახდინა ამ ასაკობრივი ჯგუფის მოსახლეობის მიგრაციულ პროცესებში აქტიურად მონაწილეობამ. 2013 წელს ემიგრანტების რაოდენობამ 95 064 შეადგინდა, რაც 2012 წლის ანალოგიურ მაჩვენებელზე 5%-ით აღემატება, იმიგრანტების რაოდენობამ კი 92 458, რაც წინა წელთან შედარებით 25 პროცენტით მეტია. მიგრაციულმა სალდომ (სხვაობა ემიგრანტებისა და იმიგრანტების რაოდენობას შორის) 2013 წელს უარყოფითი მაჩვენებელი -2 606 ერთეული შეადგინა.