ცენტრალური საარჩევნო კომისია აგრძელებს ამომრჩეველთა საინფორმაციო კამპანიას და მოუწოდებს ამომრჩევლებს დროულად გადაამოწმონ საკუთარი მონაცემები. 16 მაისს საარჩევნო ადმინისტრაციამ დაიწყო ამომრჩეველთა ბარათების დარიგება, ეს პროცესი 26 მაისს დასრულდება. მონაცემების გადამოწმება კი შესაძლებელია საინფორმაციო ბარათში ან ვებ-გვერდზე - cesko.ge განთავსებულ ამომრჩეველთა ბაზაში. თუ თქვენ ვერ მიიღეთ საინფორმაციო ბარათი, აუცილებლად დაუკავშირდით ცესკოს კონტაქტ-ცენტრს, ნომერზე - 2 51 00 51. ამომრჩევლების მიერ მომართვის ბოლო ვადაა 29 მაისი. დღეს ცესკოში გამართულ საინფორმაციო ბრიფინგზე ცესკოს სპიკერმა ეკატერინე აზარაშვილმა განაცხადა,რომ საქართველოს მოქალაქეებმა, რომლებსაც არ გააჩნიათ იურიდიული ძალის მქონე პირადობის მოწმობა ან პასპორტი, მათ შორის აღნიშნული დოკუმენტების ვადის გასვლის გამო, არჩევნებში მონაწილეობის მისაღებად დროულად უნდა აიღონ ახალი პირადობის დამადასტურებელი ერთ-ერთი დოკუმენტი მაინც. ამისთვის მათ უნდა მიმართონ იუსტიციის სახლებს ან სახელმწიფო სერვისების განვითარების სააგენტოს ტერიტორიულ სამსახურებს. წინააღმდეგ შემთხვევაში ისინი ვერ შეძლებენ მონაწილეობის მიღებას. "2014 წლის თვითმმართველობის არჩევნებისთვის საცხოვრებელი ადგილის მიხედვით რეგისტრაციიდან მოხსნილ ამომრჩევლებთან ერთად არჩევნებში მონაწილეობას ვერ მიიღებენ საქართველოს მოქალაქეები, რომლებიც რეგისტრირებულები არიან მისამართის მითითების გარეშე. ამიტომ მოგიწოდებთ, დროულად გადაამოწმოთ თქვენი მონაცემები და 27 მაისის ჩათვლით მიმართოთ სახელმწიფო სერვისების განვითარების სააგენტოს შესაბამის ფილიალს" - განაცხადა ეკატერინე აზარაშვილმა ჟურნალისტებთან საუბრისას.