ანაკლიაში კაზანტიპის ფესტივალის შესახებ მოლაპარაკებები ჯერ კიდევ მიმდინარეობს. ამის შესახებ ჟურნალისტებს კაზანტიპის რესპუბლიკის პრეზიდენტმა ნიკიტა მარშუნოკმა განუცხადა. მარშუნოკმა დღეს ბიზნეს ფორუმზე, რომელიც ანაკლიაში მიმდინარეობს, ფესტივალის პრეზენტაცია გამართა. ამასთან, მან ფორუმის მონაწილეებს ფესტივალის შესახებ ვიდო-რგოლი უჩვენა. „მიმდინარეობს მოლაპარაკების პროცესი. მანამდე კი მე ვსვამ კითხვას, სჭირდება კაზანტიპი საქართველოს, თუ კი - ჩვენ მზად ვართ“, - ამბობს ნიკიტა მარშუნოკი. ტურიზმის ეროვნული ადმინისტრაციის უფროსის, გიორგი სიგუას განმარტებით, კაზანტიპის ფესტივალის ჩატარების შესახებ გადაწყვეტილება უახლოეს დღეებში გახდება ცნობილი. მისივე თქმით, კაზანტიპი ფესტივალი ანაკლიის პოპულარიზაციისთვის მნიშვნელოვანია. „კაზანტიპის პრეზიდენტის მიერ წარმოდგენილი კონცეფცია არის ძალიან საინტერესო და ჩვენ მას განვიხილავთ. ეს ფესტივალი არის მუსიკის, სპორტისა და ხელოვნების ძალიან დიდი მოვლენა“, - აცხადებს სიგუა.