რიკოთზე დაწესებული შეზღუდვები ამ დრომდე გრძელდება. როგორც  საავტომობილო გზების დეპარტამენტში განაცხადეს, თბილისი-სენაკი-ლესელიძის საავტომობილო გზის 147-ე კმ-ზე, ხარაგაულის მუნიციპალიტეტის სოფელ ხევთან, რიკოთის გვირაბის დასავლეთით ძველი რეჟიმის მოქმედების გამო ტრანსპორტის გადაადგილება გომი-საჩხერე-ჭიათურა-ზესტაფონის გზის გავლით ხორციელდება. აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა. როგორც ცნობილია, ამ მონაკვეთზე დამეწყრილი ტერიტორიის გაწმენდითი სამუშაოები გუშინ 06:00 საათიდან განახლდა. ადგილზე იმყოფებოდნენ საქართველოს რეგიონული განვითარებისა და ინფრასტრუქტურის, გარემოს დაცვის, შინაგან საქმეთა სამინისტროების წარმომადგენლები და გეოლოგები. საავტომობილო გზის გაწმენდით სამუშაოებთან ერთად, ნიადაგის გამოკვლევა და რისკების შესწავლა მიმდინარეობდა. სამუშაოებს თვალს პირადად ადევნებდა საქართველოს საავტომობილო გზების დეპარტამენტის თავმჯდომარის მოადგილე, ნუგზარ გასვიანიც. თბილისი-სენაკი-ლესელიძის საავტომობილო გზის 147-ე კმ-ზე მოძრაობის აღდგენის გადაწყვეტილებას, საქართველოს რეგიონული განვითარებისა და ინფრასტრუქტურის სამინისტრო, სხვა უწყებებთან ერთად, მას შემდეგ მიიღებს, რაც სრულად იქნება გამოკვლეული დამეწყრილი ტერიტორია და უსაფრთხოების რისკები მინიმუმამდე იქნება დაყვანილი.