ესპანეთის ახალი მეფე ფილიპე VI დღეს ქვეყნის პარლამენტის წინაშე ფიცს დადებს. ამის შესახებ "ბიბისი" იუწყება. დეპუტატების წინაშე გამოსვლისა და ფიცის დადების შემდეგ მეფე ფილიპე და მისი მეუღლე ლეტიცია მადრიდის ქუჩებში გაივლიან და სამეფო სასახლის აივნიდან ესპანელებს მიესალმებიან. სამეფო სასახლის წარმომადგენლის განცხადებით, ფიცის დადების ცერემონიას არ დაესწრება მეფე ხუან კარლოსი. მეფე ფილიპეს უფლებამოსილება, წუხელ მამისგან, ხუან კარლოსისგან მადრიდთან ახლოს, სარსუელას სასახლეში გამართულ ცერემონიაზე გადაეცა. 76 წლის ხუან კარლოსი ტახტიდან ივნისში გადადგა. ხუან კარლოსი ესპანეთს 1975 წლიდან, დიქტატორ ფრანსისკო ფრანკოს გარდაცვალების შემდეგ მართავდა. მან მნიშვნელოვანი როლი შეასრულა 1970-იან წლებში ესპანეთის დემოკრატიზაციის პროცესში. თუმცა, ბოლო წლებში ესპანეთში მეფე ხუან კარლოსისადმი ნდობა შესამჩნევად შეირყა. მისი რეპუტაცია საგრძნობლად დაეცა კორუფციული სკანდალის შემდეგ, რომელშიც ხუან კარლოსის ქალიშვილი და მისი ქმარი აღმოჩნდნენ.